《2017國際中華小姐競選》賽前預測

今次《國際中華小姐》移師馬來西亞舉行,係自2000年後,第2次係香港以外,又係非中國城市舉辦。

TVB早係12月尾播定預告片,係威係勢咁話2017全球首場選美會「係雲頂舉行」;再加上TVB華姐官網、佳麗相都冇話循環用返過去幾年啲排版;更甚嘅係今年又改返大會評判選喎!決賽舞台會移師馬來西亞雲頂(2014吉隆坡黃之豫有提過下,但唔知到底係點?)個舞台點整都大過、華麗過TVB自己個豆腐潤一廠掛?(2013—2015呢3屆個舞台真係求其之作)如果TVB咁肯泵本,咁再寄望下製作方面,啲環節同賽制唔好再咁騎呢,所有佳麗起碼玩到5強、仲有唔好好趕時間、或者DUM時間啦。最最最重要……比冠軍繞場一周!

之不過早在去年5月已公佈此舉,本身都好期待,尤其因為成場比賽唔係100%由TVB插手。可惜又係貫切TVB搞華姐嘅作風,搞到成場比賽無聲無色咁。完全唔明白點解TVB要移師海外!更令我不屑TVB嘅係:連華姐HEA搞1星期、10日,居然可以咁肯搵個好嘅場地做個騷,仲要係外地;甚至正正經經咁搵大會評判選而唔係自己人選哂;反之同樣係10日求其宣傳下嘅香港小姐啦喎,真係……

講返今屆佳麗。其實只係10日選美,基本上都好難對佳麗有深入認識;加上全香港好似冇人知道星期日係搞華姐咁,就連我自己都冇特別去睇下佳麗資料同埋啲新聞!初步睇班佳麗記招啲相,第一個感覺係:今屆啲佳麗分咗2類,一係好「大媽」;另一類係好「妹」,大部分個感覺似啱啱讀完書冇耐果啲小妹妹咁!今年又多返2位佳麗咁「多」,但又見就係有2位佳麗幾驚嚇下!係電視咁岩見到16位佳麗,全體又變到一模一樣咁平凡!

不過再睇下,今屆真係冇乜邊個極度突出,冇乜邊個有「中華氣息」;加上又變返大會評判選,唔似舊年咁純睇現場表現同外形,見評判環節都應該對最後成績有影響下。所以今屆嚟講,都算係幾勢均力敵嘅一屆,好難估邊個可以在雲頂登上寶座

1-%e5%8a%89%e5%ae%a3%e9%80%b8

1. 劉宣逸(奧克蘭)

第一眼望佢,堅有韓星味道,但再望真啲變得好似貞子!年年奧克蘭都派啲出場後就被遺忘嘅佳麗(仲要因為改用城市名排號數,排1號都真係一出場就唔記得),希望今年呢位望落好有性格嘅佳麗,唔好似同樣係1號嘅2016港姐關可欣咁樣被唾棄,而係化返個靚妝出場爭返啲機會。

2-%e6%b1%aa%e9%9b%85%e5%a6%ae

2. 汪雅妮(曼谷)

曼谷年年出產靚女,但年年都飲恨,舊年果位差啲拎到季軍都衰埋(如果用2012、2014港姐賽制就肯定有個季軍先啦),反之1990年代得獎果啲就真係好唔掂!今年汪小姐都有曼谷佳麗一貫果種甜美,希望佢識講英文impress到啲評判。

3-%e9%a6%ae%e7%9b%88%e7%9b%883. 馮盈盈(香港)

未見班佳麗前,只認定馮盈盈入5強係一半一半機會。的確不論馮盈盈嘅外貌、戰鬥力、擺甫士、甚至係佢嘅機智風趣談吐,加上今屆質素,令佢係呢場選美幾佔優勢。不過我硬係覺得馮盈盈個PACKAGE有啲葉翠翠;加上本身材麻麻、身高亦唔高(雖然今屆身高差距冇去年咁恐怖);聽聞佢港姐才藝想表演魔術,呢個才藝真係擺落華姐的話似乎打唔到仗!同時今次唔係香港搞,或多或少都失咗啲主場之利,入5強或3甲都係炆炆地。
(另外,選港姐時發覺馮盈盈合埋嘴笑,個感覺幾嫵媚,果種嫵媚幾適合華姐)

4-%e6%9d%8e%e8%99%b9%e8%87%bb

4. 李虹臻(約翰內斯堡)

記招望佢又真係幾得人驚下,以為係芝加哥定大中華北方佳麗,點知係來自約翰內斯堡。南非真係耐唔耐先選一次華裔小姐,但最後都係選出呢種質素,除咗負責湊人數都唔知講咩好。

5-%e6%9e%97%e5%ae%a3%e5%a6%a4

5. 林宣妤(吉隆坡)

賽前呼聲好高,但近日個狀態似乎KEEP唔住。睇返佢當選後啲相,又真係幾索,仲少少似2006多倫多嘅倪晨曦。不過其實唔駛估,係人都會認為吉隆坡佳麗今年點都起碼5強,甚至3強機會甚大。但單薄身形,係主場或者多咗壓力,以及吉隆坡佳麗一向唔太突出嘅才藝,都係有礙爭取更高名次嘅因素。

6-%e6%9b%b2%e9%87%8c

6. 曲里(洛杉磯)

呢張相都已經叫做省鏡咗,記招果張(加上件衫)真係不敢恭維。抽中試戴后冠嘅佢,最後會唔會步幾位一樣試戴后冠嘅華姐咁入三甲,定係「咁好彩」試戴后冠嘅港姐咁慘敗?其實一個美國咁大,真係咁難搵到好似2004徐靜潔咁嘅佳麗?

7-%e6%9b%be%e7%90%b3

7. 曾琳(馬尼拉)

呢位佳麗越望越襟睇,身形又高佻,估唔到係來自久別4年嘅馬尼拉佳麗。佢個樣同1號一都,都係散發住韓國女星嘅味道,不過呢位望落似乎仲有深藏不露嘅Character-wise!近幾年華姐冠軍都係靠呢樣取勝,希望曾小姐由見評判到決賽當晚表現唔好令人失望啦。

8-%e6%88%8e%e8%9d%ba

8. 戎瑀(墨爾本)

完全唔肯定佢個名點讀。墨爾本佳麗衰就衰在經常被同國嘅悉尼佳麗搶鋒頭,今年呢位個FEEL有啲「港女」,但頗上鏡(似似地官恩娜),又係一隻黑馬。

9-%e6%9d%8e%e6%98%8e%e5%ad%90

9. 李明子(佛山)

個名同個人一樣咁平凡。話事話點解佛山唔係排4號而係9號?「南京」應該唔係9號添喎?好混亂。

10-%e5%bc%b5%e9%ab%98%e7%91%80

10. 張高瑀(蒙特利爾)

呢位佳麗氣質同其餘果堆好相近,暫時睇唔算好突出。

11-%e4%bd%99%e6%80%9d%e9%9c%86

11. 余思霆(紐約)

記招第一眼望落覺得氣質就似2015年8號李玉薇,但不論面型、身形、仲有條裙都好似同年季軍11號惠櫸喬,不過係額闊版!點知呢位佳麗真係同惠櫸喬一樣,來自紐約。吓!近3年紐約佳麗都正架喎,今年呢位……

12-%e9%bb%83%e5%98%89%e7%a9%8e

12. 黃嘉穎(三藩市)

三藩市舊年冇玩華姐,今年玩返。個樣都好「香港小姐」下,仲要係好重「藝員味」果啲,連個名都咁「香港」,我懷疑呢位佳麗根本係香港人;而且身高又麻麻,加上氣質麻麻,係今屆嚟講要「爆冷」入5強真係要有好強表現。

13-%e9%99%b3%e8%93%ac%e5%83%a1

13. 陳蓬僡(新加坡)

開頭望個人氣質好「大媽」下,連個名都係,但就叫做有果份東方女性嘅「高貴」,幾重黑馬FEEL。樣唔叫做特別甜美同省鏡,可觀嘅身高可能係入5強嘅其一關鍵。

14-%e4%ba%8e%e6%ac%a3%e5%8d%89

14. 于欣卉(悉尼)

呢一隻黑馬,要睇當晚表現有冇好似蔡美霆咁嘅Character-wise。

15-%e6%9d%8e%e7%8f%ae%e5%84%80

15. 李珮儀(多倫多)

望佢記招張相,想用「混血林凱恩」來形容佢。多倫多幫係2016香港先生、香港小姐競選成績彪炳,但華姐就越來越霉,今年多倫多又可能再食白果。

(話事話,到底新時代電視有冇後悔2013年因操行而冇比陳雅思多倫多華姐冠軍?陳雅思返嚟選港姐最終又係拎唔到冠軍;佢又有冇後悔當初多倫多選果時冇表現得乖啲,唔駛比人扣操行分扣到冇華姐冠軍?)

16-%e7%8e%8b%e6%80%9d%e6%80%9d

16. 王思思(溫哥華)

上年溫哥華有樣貌身形超班嘅朱亞琳參選,今年搵唔返同樣超班嘅當然係意料之內;今鋪華哥華佳麗反而係偏向近年少有嘅甜美形,雙眼仲好似懂得說話!溫哥華華姐嘅表現一向有保證;不過自2010年,華姐三甲排名Back-to-back都冇試過係同一城市拎到。咁睇下今年王小姐會唔會打破呢個宿命,為溫哥華再下一城(相信對溫哥華嚟講,華姐等同奧運咁滯,成績太差都難接受)。

最後總結個人心水5強:


2. 汪雅妮(曼谷)
5. 林宣妤(吉隆坡)
7. 曾 琳(馬尼拉)
16.王思思(溫哥華)


1. 劉宣逸(奧克蘭)
8. 戎 瑀(墨爾本)
13.陳蓬僡(新加坡)

《2016香港小姐競選》及《2016香港先生選舉》終極賽果+總結

《2016香港小姐競選》係2016年9月11日圓滿舉行。睇完成晚決賽,終於明白點解一眾港姐迷對「香港小姐」再提不起興趣。星期六睇完香港先生,仲諗仲兩個比賽又可以分開,個台又搭得幾優雅,諗住呢晚港姐可以食返住個勢,點知!以為唔會出現既問題終究出現:一班港生上港姐決賽又再鬥過;成個比賽好大段時間係「搵演員」,推埋隻不倫不類既「MyTV Super」出黎就更甚!(事後睇返維基百科以及兩比賽合併新聞先知原來係配合MyTV Super啟用)由一開始FOLLOW住個比賽,到見到余詠珊同TVB高層可以公器私用到咁,真係好心酸……

事前都預左係冇乜NOISE既兩個比賽,呢晚靜英英咁選完個冠軍出黎,冇乜聲氣都係意料中事,FACEBOOK更唔似舊年咁瘋狂式洗版。點知去到星期一,就開始有返啲NOISE啦;亦喜見有一啲討論諸如「亞軍正過冠軍」、「C君塊面對住劉穎鏇個胸」,「港生港姐同場誕生」亦有人抽水、都有人話「TVB重女輕男」。當然,大眾都開始唾棄成個比賽模式,連前港姐都話比賽似係「選演員」。但今鋪聯合,既幫港生追勢,港姐又唔駛死,投票人數又同舊年一樣有23萬,睇怕下年都仲有得搞啦,真係恭喜賀喜余詠珊啊!

司儀方面,有成5個,實屬多餘,農夫換返港姐元老級金牌司儀曾志偉仲好,不過點解請唔郁志偉既原因就唔駛多講啦。之不過呢個司儀組合都叫有啲火花,又冇起勢DUM時間。搵阿Bob都好,反應快講野流利,應帶起氣氛時帶起、應正經時正經;農夫同DO姐都叫生鬼;至於Miss HK Pigeaon 陳百祥今晚都冇乜廢話連篇,見到有啲準備。以為今年成個比賽都冇乜聲氣,一班佳麗又冇乜見報,諗住啲司儀同班佳麗猶如陌生人;又唔係喎,好流利咁讀到佳麗名,仲要講到邊個大熱,有啲意外。

正於舞台,係成晚最大既敗筆。港生個台明明搭得好優雅,攞鏡頭攞得幾靚之餘又唔見有咩人攝鏡,個背景熒幕好大程度似係為一班香港先生而設添。點知今晚真係……四個字:循環再用!其實連續兩晚比賽,都預左會係用返港生個台。首先熒幕畫面,開場由「晚空」綻放成「鑽石」成晚老是常出現,雖然唔叫差但最弊似用PowerPoint整出黎既效果!另外,都有唔少野都係循環再用返余詠珊用過既野:

  1. 「Miss Hong Kong Pageant 2016」個牌擺明係循環再用2013果個
  2. 兩邊條樓梯係2014
  3. 夏日泳裝,果個背景啲波板糖,又係2013既意念
  4. 森林泳裝,擺明係2015啦;再睇真啲,連背後佳麗張相同啲佳麗資料擺法,同2015真係一模一樣

20162016

2015-%e6%b3%b3%e8%a3%9d2015

2014-%e6%a8%93%e6%a2%af2014

2013-%e6%b3%a2%e6%9d%bf%e7%b3%962013

至於全晚最肉酸既位,當然係果嚿「MyTV Super」機械人!個台已經細,整舊咁既野更顯個舞台係好袖珍;要擺唔緊要,但成舊野睇唔出有幾增強視覺效果,「MyTV Super」呢幾個字更突顯今晚比賽係為TVB選藝員而設,焦點再唔喺班佳麗度!又好搞唔搞,台外兩邊又分上下層咁當觀眾席擺人上去坐,又有人攝鏡之餘,令到成晚氣氛唔似「比賽」,似係「節目巡禮」啊陰公!不幸中既大幸係:舊野推得返入去!

成晚啲音樂亦係「循環再用」。出場麥明詩表演果段,又係抄2013開幕;佳麗出場果首就係抄2012,但好野唔怕再用,個畫面都OK。有幾部分去完廣告返黎,就有現場用提琴拉奏出港姐音樂,有啲新鮮感。不過去到頒獎果下就有問題:為乜宣佈友誼小姐、最上鏡小姐、港生港姐季軍、亞軍果6段音樂又係播完又播呢?聽到好悶,冇乜高潮起伏。去到麥明詩讀卸任感言,果段音樂竟然係用返2012開幕果段,而唔係1993年決賽播足成晚、1994年決賽莫可欣卸任,以至1996年開始連續20屆卸任都會播果段,怪!

評判及賽制方面,「最上鏡小姐」評審係來自TVB劇集界及歌唱界2男2女:胡定欣、許志安、梁詠琪、陳展鵬。個人感覺冇乜問題,但聽到2014做過既胡定欣今鋪話「上鏡靚過真人」有啲驚!(當年佢係揀黃碧蓮既)至於選三甲,基本上沿用今年港生及舊年港姐「最強一分鐘」賽制,星級評審剩低24位。可惜今年透明度奇低,冇講到被投選冠亞季既佳麗獲得既分數,又剩係宣佈兩個冠軍既「冠軍票數」,查實有成23萬人投,但馮盈盈得36,679又真係低得可憐;但正因為賽果合理,所以先冇人查證……

全晚環節都係睇到人冇心機。港生啲環節都叫Organised,焦點都叫做係班先生度;但港姐完完全全係似為TVB選藝員。(根據20強佳麗何瑩瑩非正式書面答覆,本來應出現既才藝表演取消左。)

  1. 開場:10位港生伴港姐,又用返2012開場果首音樂,都叫做好聽。不過由Leslie Lee設計的《星與美的邂逅》晚裝……幾肉酸。10位佳麗自我介紹+進行問答,呢啲先係正路問題,唔該!點知4位港生,今晚又出黎比賽?(心諗:若真係兩選美合併,應該係咁搞!)順帶一提:雖然要輸左果6位港生出場係好瘧待,但全線狀態好過前一晚決賽。
  2. 多才多藝:本以為第2、3環節一定係才藝表演,點知原來係余詠珊選美一定有既跳舞。佳麗啲頭髮冇紮起,個個都揸住枝管跳,冇人雞手鴨腳,幾有動感。好快跳完唔知搞咩,原來係比班「星級評判」一輪咀講有咩節目做,要揀咩人。成半PART都係評判講哂,選藝員選到出哂面,救命!不幸中既大幸:有一份合約係面膜廣告商合約。接住10位佳麗就SELL自己。
  3. 泳裝問答(一)夏日:佳麗頭髮冇被紮起,更大突破係啲CATWALK冇以前咁死板,有好幾位行得甚有超模FEEL。之後啲問答又出事:就係啲「女士問題」,雖叫考反應談吐但都似考埋演戲,問題未去到2005果種露骨但都係低俗無倫!除此,又有港生4強出黎問問題;嘩,如果真係合併左兩選美,分分鐘成PART都係男女PK賽都似!然後有6位落選港生揀選港姐港生。
  4. 泳裝問答(二)森林:10位佳麗再度登場,真心覺得今晚CATWALK係好好睇。輪到6—10號佳麗問答,同樣都係果啲低俗問題,只見後面熒幕真係抄足2015。
  5. 晚裝:由4位香港小姐招募大使領10位佳麗,穿著由時裝設計師Kev Yiu與胡杏兒設計的《流光溢彩》晚裝,相當華麗。胡杏兒分享心聲同最鍾意既佳麗,佢就揀2號劉穎鏇。之後又係去返簽邊啲人做咩節目,又佔哂成PART一半時間,又比森美CHUR住,DOWNGRADE哂。
  6. 嘉賓表演、頒獎、宣佈4強:先由李克勤獻唱《一個都不能少》,10位佳麗陪伴擺下POSE顯美態,都唔錯,但感覺好似…華姐!宣佈最上鏡小姐,我個心係勁跳,可能因為呢個獎競爭大,估計應該係5>7>2攞,最後係2號劉穎鏇獨得,個心定啲;然後去到4強,估計以今晚表現同評判眼光,應該有2、6、7,估計5/10都有可能。宣佈第2個係7號,開心到拍手;宣佈第4個,台下勁叫3號,最後係5號彈出,好欣喜。
  7. 「四強對四強」演講:本身係一間大學開住MyTV睇,但坐住間房就快閂,最後要臨急轉場,忙中仲要改TVB Fun香港小姐投票選擇。一開始睇已經係1號香港先生演講,原來又係4位港生再比賽!之後再聽,每位佳麗既演講都幾令人為之動容。
  8. 宣佈香港先生及香港小姐三甲、冠軍繞場一周:歷史上首次同台宣佈香港先生同香港小姐三甲,次序先香港先生後香港小姐,交錯宣佈季、亞、冠軍。最衰係啲音樂,播完又播,HEA到!港生季、亞、冠頒獎者係岑麗香、陳凱琳、袁偉豪,意料之內。而港姐呢個4強組合,估計季、亞、冠次序係:7、2、6,結果中左。最後冠軍繞場一周,個畫面又真係唔肉酸,但叫奇怪!

總結黎講,成晚RUNDOWN係選藝員!而港生決賽都冇港姐一同比賽,反而港姐決賽加入返港生4強,予人「港姐撈港生搞、港生獨自一場決賽」之感。不幸中大幸就係即使OVERUN哂,都冇一味HurHur聲趕頭趕命!(因為係《傳奇誕生》扣返起啲時間)

最後14位佳麗表現,港生4子全線好左,反而港姐幾乎全線跌哂WATT,得5號蘇韻姿叫做狀態大勇。

5-%e8%83%a1%e3%bb%97

5. 胡㻗

  • 香港先生第四名

等左成日都係得個桔,今晚個樣好左,但全晚最唔掂係果句「不應批評台上每位參賽者」。

1-%e9%8d%be%e5%90%9b%e6%8f%9a

1. 鍾君揚(多倫多)

  • 香港先生季軍
  • 現場表現最佳香港先生

黎振燁丁子朗鷸蚌相爭,鍾君揚失利,樣貌YOUNG得黎幾吸引。雖然係多倫多係贏左今次亞軍丁子朗,而成晚冇乜表現機會下僅獲季軍,但睇佢似乎好滿意。

9-%e4%b8%81%e5%ad%90%e6%9c%97

9. 丁子朗(多倫多)

  • 香港先生亞軍
  • 最上鏡先生
  • 現場最受歡迎香港先生

丁子朗絕對係香港先生既一個經典人物:20歲都唔夠就打入香港先生三甲,仲成為首個「最上鏡先生」兼三料香港先生亞軍。我覺得佢今晚個樣先叫做「上鏡」喎。唔知丁子朗呢位咁年輕既最上鏡先生,又會令幾多男仔/男人會話「夢想係成為香港先生」呢?

4-%e9%bb%8e%e6%8c%af%e7%87%81

4. 黎振燁

  • 香港先生冠軍

黎先生今鋪以44,420「冠軍票數」及30歲之齡成為香港先生冠軍,其「好男人好丈夫」包裝被稱為「劃時代」既香港先生。今晚狀態FIT過昨晚,再冇駝背,問答環節KEEP住轉數快又冧死人。黎先生既表現同包裝好大機會成為新一代香港先生(甚至香港男人)既「典範」。

1-%e9%97%9c%e5%8f%af%e6%ac%a3

1. 關可欣

個樣勁邪,仲被批評為似妖后,又不在狀態咁,介乎笑與唔笑之間,最亮眼就係泳裝行出黎幾有超模FEEL。自我介紹詹SIR上身咁係港姐舞台咁大爆「AV」兩個字,本來係好好笑既GAG但竟然冇人笑。

4-%e4%bb%a3%e8%93%ae%e6%9b%a6%e4%b8%b9%e7%be%8e

4. 代蓮曦丹美

蒙古群主參選政綱為「將新元素帶入香港小姐」,結果今晚表現完美兌現她的競選口號:問答環節被司儀辣兩句就失控發花顛潑婦罵街,配合典型既低操行分又得罪髮型化妝既森林之王造型,十足十老虎乸上身使其強國大媽形象原形畢露,將香港小姐既高貴又大方形象推向新低點,與余詠珊誓要玩殘香港小姐招牌既意念配合得天衣無鏠。今趟余詠珊執到啦,連藝員訓練班都唔駛讀,拿拿聲簽天生注定食呢行飯既代蓮㬢丹美小姐捧做花旦啦!

8-%e9%98%ae%e5%98%89%e6%95%8f

8. 阮嘉敏

阮嘉敏由入圍時勁重藝員味,搖身一變成為淑女一名,唔知係咪因為咁令到佢一份合約都贏唔到。談吐流利,又夠轉數,短頭髮都幾耀眼。唔知點解著泳裝時,唔駛列隊,淨係佢一個行出黎都覺得佢好矮,或者條腰太短。

9-%e9%99%b3%e7%9d%a3%e9%9b%af

9. 陳睿雯

  • 最佳首飾演繹獎

流利的談吐是陳睿雯小姐既最大武器,果然今晚都淡淡定定,樣貌算係省鏡左,連鄉音都改善左,惟獨問答環節硬係UP唔出「食軟飯」呢3個字,到底係講唔出,定係唔識呢個粵話俗語呢?

10-%e5%96%ae%e6%96%87%e6%9f%94

10. 單文柔

小妹妹味不再,個嘴畫到好深令佢既魅力提升,問答都幾流利。佢啲衫好奇怪,總係搞到佢好骨架好厚但又唔橫,然後雙峰中間有條罅開到條腰到,但又唔覺得佢好豐滿,好出事。成晚睇佢甚有黃心穎影子,好驚佢爆冷拎埋亞軍,好彩。

3-%e5%bc%b5%e5%af%b6%e5%85%92

3. 張寶兒

  • 友誼小姐

表現不俗,保持甜既笑容,予人感覺親切。宣佈4強果時,去到第3個台下已叫緊佢,可見觀眾緣不俗。入唔到4強,係咪「香港小姐統籌委員會」發作?

5-%e8%98%87%e9%9f%bb%e5%a7%bf

5. 蘇韻姿(多倫多)

  • 香港小姐第四名

全晚狀態最FIT既一位,問答靈巧(雖然焗住發姣),樣貌好上鏡,拎唔到最上鏡小姐係咪因為全晚死KEEP住同一個笑容呢?個人亦認為蘇小姐入4強未算超額,但以佢既賽前熱度加上觀眾緣疲弱(仲有TVB Fun張相),好難唔墊底。

7-%e9%99%b3%e9%9b%85%e6%80%9d

7. 陳雅思(多倫多)

  • 香港小姐季軍
  • 最喜愛佳麗

陳雅思拎到季軍真係要去黃大仙廟還神!唔係話佢唔靚,而係因為以為觀眾緣薄弱加上並非傳媒焦點下,以為佢拎唔到票入圍,好彩表現上佳之餘仲有蘇韻姿入4強墊佢底。出場果時個樣非常老成,但仍然非常美豔;舉止聲線高貴優雅,面對司儀低俗問題仍答得大方得體,更顯其內涵,笑容亦非常甜美,一貫港姐冠軍標準模範,正宗符合「美貌與智慧並重」人辦。可挑剔既係雖選過美但臨場好鬼緊張。3年前選多倫多華姐飲恨只得亞軍,今次退步拎季軍,但見到佢都好滿意!鬼咩,張名雅當年冧SERVER,邵珮詩當年冇哂比佢更熱既入三甲;今鋪冇大會評判選,又撞正全民投票!
(但因乜解究志願會填「成為TVB藝人」架呢?)

2-%e5%8a%89%e7%a9%8e%e9%8f%87

2. 劉穎鏇(洛杉磯)

  • 香港小姐亞軍
  • 最上鏡小姐
  • 現場最受歡迎佳麗

劉穎鏇呢位亞軍同香港先生亞軍丁子朗不單拎同樣既獎,更一樣係19歲兼海外佳麗;此外,劉小姐更打破后冠魔咒!談吐流利,身材豐滿亦火速成話題,但個人認為佢壓台感未係發揮到最大。劉小姐亦係近年來少數咁年輕就入三甲既佳麗,以佢呢種質地絕對係近年香港小姐罕見上佳既國際性選美材料,當然TVB絕對將寶當係草。唔知劉小姐會返美國讀埋書先,定會入TVB呢?

6-%e9%a6%ae%e7%9b%88%e7%9b%88

6. 馮盈盈

  • 香港小姐冠軍
  • 現場最受歡迎佳麗

6號馮盈盈雖並非本人心水,但其包裝及表現仍算服眾。一出場個髮型唔得,頭頂扁塌塌,顯唔出佢既靚輪廓,幸好其青春甜美樣子搭救。問答口甜舌滑,而舉止亦略略滲透嫵媚既味道,演說自然流露,甚得大眾及星級評判歡心。其「本土」包裝亦屬近15年冠軍裏少數,最後獲得36,679「冠軍票」令全場大為感動,圓馮盈盈自小「拎住雞毛掃當權扙」之夢。

%e7%b9%9e%e5%a0%b4%e4%b8%80%e5%91%a8

「係咪好感人呢?」(Asked by 陳百祥)
歷史上首次香港先生及香港小姐同台繞場一周,睇落係幾感動,尤其聽到兩位既故事。

仲未夠喉?可以睇下今屆港姐港生既冷知識!寫到呢到,都好鬼長,買埋下星期一出版既TVB周刊(今年唔係號外啦),追蹤左好耐既比賽就完啦。唔知下年會搞成點呢?會唔會先港姐後港生?余詠珊又記唔記得下年港姐係45周年架?下年又派唔派馮盈盈去馬來西亞選華姐?好驚!

 

最後不如競猜埋即將公布既今年Blogger Choice賽果:

香港先生(好難估下)

冠軍:3. 梁裕恆
亞軍:2. 麥凱程
季軍:1. 鍾君揚
最上鏡先生   :9. 丁子朗
國際親善先生  :1. 鍾君揚
才藝先生    :9. 丁子朗
最佳泳衣演繹獎 :3. 梁裕恆
最佳變臉大獎  :8. 伍禮騫

香港小姐

冠軍:2. 劉穎鏇
亞軍:7. 陳雅思
季軍:6. 馮盈盈
第四名:5. 蘇韻姿
第五名:3. 張寶兒
最上鏡小姐   :2. 劉穎鏇
國際親善小姐  :7. 陳雅思/3. 張寶兒
最佳泳衣演繹獎 :2. 劉穎鏇
最佳變臉大獎  :10. 單文柔/9. 陳睿雯

《2016香港先生競選》賽後點評

《2016香港先生競選》係2016年9月10日完美落幕,成晚可以話當一個騷咁睇,所以幾乎笑足成晚。呢兩個星期一直避開廣告,又唔上Facebook專頁同睇娛樂新聞,費是知道太多呢兩晚比賽既野……雖然冠亞軍仲未麈埃落定,就趁未選港姐仲放緊假又仲記得個比賽搞成點,上黎寫一寫低先。

首先想講:唔怪得《香港先生》係用「選舉」而唔係「競選」啦,原來香港先生既英文名係「Mr Hong Kong Contest」 而唔係「Pageant」!所以成個比賽都係選小生既SHOW一場。另外,好幾個月前阿統籌經理余詠珊表明會將兩個比賽「合併」,我心都離埋,心諗:唔係呀嘛,點合併啊,好核突架喎!上星期聽到啲廣告話咩「兩個比賽聯合」,已經唔敢去諗。結果,呢晚只係搵候選港姐上去港生度亮下相,同埋港生賽果港姐內公佈,唔係一齊比賽,咁都好啲。總之《香港小姐》點都要壓軸同唔郁得架啦。

講返個比賽,今年查實係第一年咁認真睇港生,但都唔覺得係比賽一場,比賽節奏唔濃厚,似足《歡樂金宵》。個舞台不再騎呢,搭得都叫做有啲Elegant,係唔夠華麗,而背景啲熒幕都造得幾靚添,尤其係問答環節背景張10強肌肉照,雖然都係抄《Mr. Health》但性感得黎又健康,可以話一洗港生「選鴨」形象。今晚舞台設計最抵讚就莫過於一班「星級評判」同「最上鏡先生」評判都搬返落台下睇,唔駛攝鏡;其實都方便佢地唔駛好似舊年班佳麗企係台前,咁靠望住個熒幕睇佳麗表現。另外,啲音樂換左,冇舊時果首咁「銀耳」,不過點都唔會港姐咁好聽同經典(整左N個版本N首歌出黎)架啦。

至於啲服裝呢,頭一回合晚禮服點都好難出事;才藝表現冇乜好講;之後「剛柔」果部分跳舞衫都係服裝間有乜就塞比班男士著,之後套唔知咩設計師設計既銀河系衫可以話好MK。眼見啲評判既衫(以及髮型),可以話都係用完又用:起碼認得出森美、黃心穎果兩套係佢地本人唔知咩場合著完又著,可見班評判有幾「重視」呢個競選;另陳庭欣果套同埋髮型都係一樣情況啦。

司儀方面,搵DO姐實冇死,同農夫都有啲火花又好好笑添。之不過咁,難得香港歷史上首個「友誼先生」同「最上鏡先生」誕生,讀個獎項同得獎者時,讀得冇乜高潮迭起感覺,嘥哂。

賽制方面,都係同舊年港姐「最強一分鐘」一樣,由TVB Fun會員排冠、亞、季軍,佔總成積50%;另50%由「星級評判」同「香港先生統籌委員會」比分,選出最後4強,不過今年冇講冠亞季各佔幾多分喎!而「最上鏡先生」5位評審是由3位歌星、1位TVB劇集紅星同1位女名模組成:蘇志威、蔡一傑、蔡一智、黎耀祥、周汶錡,男多過女喎!不過都好過搵啲二三線選,起碼呢5位評判都叫有經驗,唔係齋睇樣而係睇埋表現,起碼講得出「由內散發到外」呢啲專業少少既評審標準。而宣佈4強既方式,個人都係偏向一次過讀邊4個好啲,不過最後得返3同5,又真係幾緊張既!(有人估計呢個宣佈次序同排名有關,如果真係咁宣佈都好過2013港姐由第10慢慢Eliminate到冠軍)

全晚節目環節方面:

  1. 開場:有得行Catwalk+講下啲內涵野係幾好
  2. 才藝表演:我就唔多鍾意睇。不過才藝後有問答喎,有啲評判問得算刁鑽,有啲講得仲多過班佳麗;而班佳麗好幾個都答得大方得體喎。
  3. 剛柔環節:余詠珊既選美,預左有跳舞環節,係爭在點跳、跳幾耐同埋同咩人跳:但呢個「剛柔」環節,「剛」既唔夠剛、「柔」既太柔,又毫無動感可言;跳完未夠時間去廣告,又搵黃智雯同跳子羚上台抽港生水,不過冇泳裝又唔想悶死啲觀眾係可以理解既,但真係難為一班候選佳麗。
  4. 問答環節:好期待架,點知余詠珊一貫亞洲先生既低俗趣味,要整啲咁既問答,完全考唔唔到一班先生既內在同智慧喎!其實如果要又考到港男轉數同口才,又唔悶死觀眾,可以參考下1994年港姐比8塊牌佢地作下估仔咁呀,又或者好似2008年港姐咁玩下辯論啊!
  5. 港姐揀港生:冇乜意見,當表演環節咁睇

「未能平衡雅俗」係2012年余詠珊接手綜藝科果時話停辦香港先生既原因;好啦,今年不是高雅,就是低俗,走向兩極,多謝哂!

班參賽者既外在同表現,大家都應該有目共睹,我就認為真係好似周汶錡話齋:「個個都人自己既Style」囉!

2-%e9%ba%a5%e5%87%b1%e7%a8%8b

2. 麥凱程

我認為佢係靚仔,不過是晚企係個台冇乜神采,演講技巧一流(如果要Present呢啲Topic既話)但內容唔夠娛樂性。另,後面張相影到佢身形有啲略肥喎,唔知呢個係咪其一落敗關鍵。

3-%e6%a2%81%e8%a3%95%e6%81%86

3. 梁裕恆

今晚甫出場已見到明顯既魚尾紋,連佢自己都承認既「臉肥」問題都沒有改善,撞岩最上鏡先生評審男多過女,狀態一般,又介乎笑與唔笑之間,對鏡頭生硬左啲,注定無緣成為香港首位「最上鏡先生」。才藝表現其實表演呢啲,可能係佢強項,但本人真係麻麻呢類!問答環節比人魚肉,唔夠淡定,聽得出說話都係爛爛地果種,出賣哂佢。Performance-wise奇弱,倒灶有理。(不過以佢呢種質地都空手而回,TVB當然會比人話「造馬」同「假普選」啦。)

6-%e9%a6%ac%e4%bf%8a%e5%82%91

6. 馬俊傑

今晚叫做表現盞鬼,才藝表現同劉佩玥表演場戲都算好笑兼睇到演戲潛質添,亦見身形拍得住其他成熟啲既參賽者。但小白臉味道仍在,樣都係平凡。

8-%e4%bc%8d%e7%a6%ae%e9%a8%ab

8. 伍禮騫

個人認為佢係最靚仔既一位,身形某程度上靚過3號(因為黑黑地),更係我初期「最上鏡先生」之選添,不過見到1號既笑容對比8號後期既倦容又真係要改;問答都有紋有路。但唔入4強係咪因為「葉繼歡」邪牌樣唔討大眾歡心?

10-%e6%a2%81%e8%b3%a2%e5%9f%ba

10. 梁賢基

另一位見到進步既佳麗,不過髮型都係差,問答環節比蝦頭玩緊但憑住一口ABC口音既英文過到骨。

7-%e6%a5%8a%e7%81%8c%e6%be%a4

7. 楊灌澤

  • 友誼先生

雖然舞技不俗,但都係小白臉味濃。早前雖然宣佈邊位係「友誼先生」但我係唔去睇,等到決賽先知既,初時估6、7、10拎架啦,原來係7號,其實佢拎都正常……

1-%e9%8d%be%e5%90%9b%e6%8f%9a

1.  鍾君揚

  • 最後4強
  • 現場表現最佳香港先生

一洗青澀味,笑容夠燦爛,問答環節第一個行出黎都淡淡定有錢剩,身形亦不俗,入4強合理。

4-%e9%bb%8e%e6%8c%af%e7%87%81

4. 黎振燁

  • 最後4強

另一位以「演講」作才藝既佳麗,以為大眾都唔BUY呢類悶死既表現,點知黎先生既內容完全可用「感動」來形容;問答環節都顯出其轉數快喎,不過要黑黑實實既佢著住果件「天使衫」表現柔既一面又的確好唔Match。另外,佢當晚略顯寒背喎……但論整體包裝,依然應該入4強啦。

5-%e8%83%a1

5. 胡㻗

  • 最後4強

爆冷入4強。全晚表現平平無奇,樣貌唔討好,才藝表現打鼓似SHOW「CHOK樣」多過打鼓技巧。「羅天宇細佬」+「選唔到2012香港先生」既身份令佢有啲運行下。話事話記得上星期開始TVB Fun投票,啲歐陽巧瑩、溫家偉等人都盲叫人投胡先生做冠軍喎,唔知係咪因為咁台下啲星級評判都投佢冠軍先?之不過咁,雖則我唔BUY佢,Blogger Choice更比佢最低分,但當台上剩低3、5,我係勁想3號倒灶,寧願5號入,點知真係「CONGRATULATION」果下我更拍爛手掌!

9-%e4%b8%81%e5%ad%90%e6%9c%97

9. 丁子朗

  • 最後4強
  • 最上鏡先生
  • 現場最受歡迎香港先生

表現不俗,才藝表現夠料,但未係我心水;佢拎「最上鏡先生」我就有保留(仲要係香港歷史上首人),但未係最差人選。不過觀眾緣真係最好,似乎應該係「3料_軍」啦。(其實9號同5號入4強,我揀唔到季軍)

 

對於呢個賽果,好似好多人有意見喎!而我一直都認為,香港先生一直比人詬病似「選鴨」;難得今年CUT「齋著泳褲」環節,又加亞、季、最上鏡先生、友誼先生,似返少少正式香港選美;而雖然成個節目都係為選小生同歡樂金宵,但既然個個選完都冇個紅,咁我認為唔應該再選一個曇花一現既冠軍!4號係唔上鏡,但氣質起碼夠男人,包裝更顯出其「香港形象」,加上身形標準,轉數快,起碼對得住一直唔睇港生男觀眾!(係咪對得住用下半身諗野既就唔知)

余詠珊今年玩噱頭玩到咁,唔知咁樣谷收視有冇效啦!宣佈4強以為有比賽環節後加冕,點知Hold成日比人再投過,唔知呢一日會唔會有咩影響呢?(突然比人爆黑材料就大鑊)好啦,今晚真係宣佈王者啦,好期待之餘又要睇另一個更重要既重頭戲:《2016香港小姐競選》,唔知賽果又會唔會出人意表呢?

 

最後總結:

個人心水

冠軍:4. 黎振燁
亞軍:1. 鍾君揚
季軍:9. 丁子朗

民間心水

冠軍:9. 丁子朗
亞軍:1. 鍾君揚
季軍:4. 黎振燁

《2016香港小姐競選》賽前點評及預測

今年港姐真係完全令一眾選美迷提不起興趣,更何況係大眾呢……

相對2015本人提不起興趣,去到決賽前2星期仲未記得幾號打邊個,其實本人對今屆港姐甚有期待,尤其係入圍30人,入圍2個星期已記熟邊個係排第幾,同埋佢地既姓名,連樣都記得,諗住TVB應該可以搞得好好睇睇掛!

點知,今年余詠珊一開始口響響講明增加名額至50人,到面試人數有140人。明顯今年質素有所提升架。本來好地地揀左30人,點知好搞唔搞,搞到好似2012咁,一開始就淘汰10人;點知係再衰過2012:係冇咩比賽表現下兩輪淘汰左20人,剩低10個先係8月中去日本福岡拍外景。其實港姐少左贊助加上搞埋港男預算少左又分薄左,又撞正奧運,因而減到10人入決賽,係可以理解;但明明今年30個人面,差既只係少數,質素不俗既就大有人在,偏偏TVB可以無聲無氣下 咁就淘汰汰左。咁對大眾黎講基本上都唔知道原來入圍仲有咁多個;而對一班候選佳麗黎講,唔好話爭獎項,就連增加少少知名度的機會都冇呀!余詠珊仲好意思將呢個比賽用黎選花旦……

如果比我搞,既然預算咁有限,我會6月選完30強,之後奧運前夕係電視城搞個1990年代決賽咁上下既嘉年華會,以鬥靚為主既準決賽,再慳錢啲可以彷效1999年比佳麗自選歷屆港姐著過既泳衣;然後選決賽12—15強再去拍外景,好過而家不倫不類真人騷又唔係又靜雞雞咁選左出黎都冇人 知,一班佳麗仲要比TVB咁樣糟蹋掛……

講返今屆佳麗質素,前文提過係有所提升,好多人都話冇咩邊個特別差。如果決賽增加入圍名額,比返啲落選既大熱入圍,整體質素都可以媲美1987、1988年(冇李嘉欣版)掛!另外,如果有留意港姐「魔咒」 既,應該知道自2008年起,逢係雙數年,入選佳麗質素都係好「平均」既,今年也不例外。而呢啲年份選出黎既港姐或港姐本身都會出事,同大家「回憶」下:

  • 2008:官網有另一版本賽果+HEA爆冠軍
  • 2010:冠、季軍因「美貌」而上CNN
  • 2012:港姐40周年,首次全民投票因「冧Server」爛尾收場
  • 2014:決賽賽制同當日「人大831特首普選框架」如出一轍,加上大熱吳凱欣落選,比人詬病為「假普選」

適逢今年又係雙數年,仲要撞正911決賽,唔知最終TVB又搞啲咩「傑作」猶如15年前恐怖襲擊呢?

_20160910_100009

1.  關可欣

本屆黑馬。今屆好多人個名又特別又撞名又剩,好多人都希望另一位姓「蘇」既「可欣」入圍之際,就殺出呢位姓「關」既。(可惜佢唔係姓「莫」,哈哈)身高不俗,包裝越見大方得體,本人覺得佢幾有機會突圍而出;不過樣貌不甚穩定,對鏡頭唔識表現自己最靚一面,但感覺最上鏡女評審應該幾LIKE佢。若果決賽夜憑 好表現入三甲或拎最上鏡,但加冕時個妝好肉酸,有機會成為比大眾插「樣衰」既箭耙(其實係TVB既問題)。

三甲機會率:60%

冠軍機會率:15%

最上鏡小姐機會率:30%

_20160910_100024

2.劉穎鏇(洛杉磯)

本屆次熱門。來自洛杉磯既劉小姐雖然年紀輕輕,但一身散發着一種獨特既異國風情,加上係30強當中最高,而身形豐滿,理應係標準既亞軍人辦。可惜觀眾緣未及大熱門,加上早期泳裝相見到條腰異常「肥美」,幸好近日狀態有所回升,入圍仍有機會。

三甲機會率:60%

冠軍機會率:10%

最上鏡小姐機會率:45%

_20160910_100036

3. 張寶兒

本屆大熱之一,有「少女周迅」之稱,笑容可算係30強最「甜」既一位。整體氣質談吐等各項都予人親切之感,本人仲認為佢有少少「王愛倫」既影子,不過身高身材麻麻,似乎一眾巴打未必好BUY。若要入圍,決賽夜要加把勁。

三甲機會率:50%

冠軍機會率:25%

最上鏡小姐機會率:50%

_20160910_100055

4. 代蓮曦丹美

本屆另一大熱門,不過熱得離奇。來自蒙古既4號全名為「木華兒.塔塔黎.代蓮曦丹美」,本身個名5個字已夠架勢,加上其「蒙古邵主」身分甫入圍已令人醒一 醒神。呢類佳麗絕對係「多多事實」、「造作搏搶鏡有新聞」的那一類佳麗:由未入圍已狂係IG哂三點式相、到宣佈10強前又有做義工執垃圾、東網投票更有疑似買 LIKE事件、對上一次泳裝出鏡更好學唔學學麥明詩「露毛」既屎橋,可見呢位4號絕不簡單,唔知後台工作人員有冇因此而扣佢操行分。而一頭藍色髮既4號氣質極為MK,時而啤酒妹時而砵蘭街;其蒙古郡主(積係強國)既背景都令一眾網民非常仇視佢添。話雖如此,呢類佳麗仍有一眾捧場客;若選中佢入三甲,今年應該有 唔少迴響。

三甲機會率:75%

冠軍機會率:55%

最上鏡小姐機會率:70%

_20160910_100120

5. 蘇韻姿(多倫多)

5號同1號一樣,同另一20強熱門佳麗「魏韵芝」撞名。入圍時未見突出,不過入圍後包裝漸見高貴,而且對住鏡頭非常淡定自然,說話談吐聲線令人舒服誠懇,流暢自然不造作,(可能因為做過電視節目主持)令人越來越受落,表現力甚強,絕對係係本屆黑馬。

三甲機會率:55%

冠軍機會率:20%

最上鏡小姐機會率:70%

_20160910_100134

6. 馮盈盈

本屆大熱,最大缺點係性格有形無形中涉透出一點點「港女」既味道,比著以前評判選,馮小姐呢款包裝頂籠得亞軍(女朋友格)。不過佢多次提及自己係「香港出世、香港讀書、係香港大學畢業」,用「本土」去Present自己,2013年7號沈桂澄和2014年11號吳凱欣已經用過;估唔到今鋪馮小姐翻炒呢個包裝又幾令人受落。另外,樣貌同個名有少少「李珊珊」既影子既6應該會係全男班評審下拎到最上鏡小姐,除非化醜妝醜髮型。

三甲機會率:80%

冠軍機會率:60%

最上鏡小姐機會率:75%

_20160910_100149

7. 陳雅思

本屆熱門,曾參選《2013多倫多華裔小姐》但竟然輸比梁淼,屈居亞軍,2014年冇得黎香港同陳凱琳拗手瓜。以陳小姐呢款包裝及氣質,由傳統大會評判選,唔好話呢10強,即使係30強當中仍屬冠軍鐵膽;加上2012年冠軍張名雅及2014年冠軍邵珮詩都係加拿大新時代電視既華裔小姐亞軍,再隔2年陳雅思理應延續呢個「魔咒」。另外,本人認為若最上鏡評審係全女班的話,陳小姐應該幾大機會攞到。可惜呢類「標準港姐」格既最大弱點就係觀眾緣麻麻,真替陳小姐擔心!不過咁,本人仍認為佢有入圍希望:皆因選美經驗豐富,若有超班表現可能係大會評判手中搶到勁多票入圍最後決賽;但若要全民投票奪冠,真係要搵好幾個差佢9條街既人墊佢底,即係跟住介紹既3位。

三甲機會率:85%

冠軍機會率:40%

最上鏡小姐機會率:75%

_20160910_100212

8. 阮嘉敏

8號阮嘉敏置身於30強當中惟一一個留着一把短髮,係TVB垃圾styling既選美當中初期十分搶眼。呢樣都唔係佢30強裏耀眼既一面,反而係佢個人滲透出一種濃烈既藝員味道,彷如2012年24號林泳淘既翻版;最攞命係連佢自我介紹都非常落力地SELL自己「想做電視節目」,其實阮小姐咁想入娛樂圈真係唔駛咁落力表現,反而學下4號咁多啲見報增加知名度仲好啦。雖然初期因同男明星拍過廣告,都叫受注目,但一路落黎冇乜進步,加上因為一句選民既意見而封鎖左選民IG,足見不單包裝唔夠大方得體,更係港女一名,決賽夜應該陪跑多。(話事話,原來佢同2014季軍7號何艷娟選過同一屆校花…)

三甲機會率:15%

冠軍機會率:0%

最上鏡小姐機會率:35%

_20160910_100225

9. 陳睿雯

來自強國9號陳睿雯小姐置身於30強當中完全毫不起眼,但竟然首輪無被淘汰,更在次輪由TVB FUN投票+大會統籌委員會評分下,擊敗眾多大熱次熱黑馬入圍,好有理有令人懷疑佢既「低調」、「乖乖女」性格甚討後台工作人員歡心,因而贏得不少操行分入圍。此外,現在中大就讀碩士既陳小姐談吐出奇流利又大方得體,估計應該有返咁上下內涵;比著以前由大會評判選,係見評判環節應該揮低其餘佳麗搶分入三甲。雖然陳小姐樣貌省鏡左,更係贊助商搞既活動當中拎到「最佳首飾演繹獎」已不算空手而回,但同4號一樣,其濃烈強國味+強國背景+鄉音廣話非常惹人仇視,加上表現平平無奇,決賽要入圍最後決賽真係要睇下啲後台工作人員操行分數幫唔幫到佢;同4號一樣選中佢,TVB會比人狂插。

三甲機會率:65%

冠軍機會率:0%

最上鏡小姐機會率:0%

_20160910_100246

10. 單文柔

單文柔本來係半冷門半黑馬入圍,其「小妹妹」感覺濃烈(但已經成26歲),說話談吐又「掘雷槌」,理應最多去到季軍。不過一去日本拍外景換上泳衣,其豐滿身材表露無遺;而在東網民調更加由頭帶到尾領先,拋離其他熱門兼穩步上揚,令人嘖嘖稱奇!表現亦見有進步,觀眾緣似乎不錯,睇下今年決賽夜能否保持優勢,定 係曇花一現。

三甲機會率:70%

冠軍機會率:70%

最上鏡小姐機會率:15%

 

最後總結:

個人心水

冠軍:7. 陳雅思
亞軍:2. 劉穎鏇/1. 關可欣
季軍:1. 關可欣/5. 蘇韻姿

最上鏡小姐

全男班評審5強順序:6/7/1/2/3
全女班評審5強順序:7/3/1/2/5

《2016香港先生競選》賽前點評及預測

本身都唔諗住寫篇賽前預測同評論架啦,但一來身痕手痕,二來今年都算追蹤下兩個比賽,所以都寫人生第一篇選美評論(都可能係The one & ONLY one)!

先 不論參賽者質素,今年復辦《香港先生》,無疑都係阿統籌經理余詠珊小姐諗出黎谷收視兼選小生既噱頭…咁好啦,你要選但搞得咁HEA,由頭到尾冇聲冇氣,初 輪面試揀完17個仲要再揀,點知搞完又係14個入圍;好啦,14個入左圍,又係毫無比賽下,先有王浩信細佬王瑋彤退選,剩低13個都要為淘汰而淘汰剩10 個先去台灣拍外景,最弊係淘汰左既3個都係質素不俗既3人!咁其實由初選61進17,17進14,14進10,搞咁多野為乜呢?直接初選61進10咪算 啦!成件事真係……

好啦,直到決賽逼近,眼見去到8月31日,官網先有一段10位「候選佳麗」既自我介紹片段,但連介紹10位候選佳麗既電 視廣告都冇,真係好難怪大眾完全唔知原來今年有選香港先生,唉。難為一班入圍者要簽成15個月約,成個比賽擺明係選小生但又搞到無聲無氣,一班佳麗完全無 提升知名度,咁選黎做咩呢?

之不過咁,眼見今年可以CheapCheap地去下台灣拍外景,又取消左「齋著泳褲」環節(其實我幾BUY喎, 反正泳裝都比人詬病做選鴨,根本唔係從選美角度去欣賞,加上又唔係冇露肉環節,反而加多啲問答環節仲好啦!)又加返冠、亞、季軍,成個比賽似乎會「正常」 啲掛!不過啲衫應該都係醜,服裝間有咩都塞比班先生著架啦(睇下台灣外景啲衫就知,最攞命係著完再著,陰公!)。

話事話,今年加返冠亞季,咁會唔會同港姐冠亞季分別選「老婆」、「女朋友」同「小妹妹」一樣(查實到千禧年10屆有8屆都唔係),三甲分別係選「老公」、「男朋友」同「大哥哥」架?

好啦,係時候簡短評下10位「候選佳麗」:

_20160910_091046

1. 鍾君揚

個人認為係黑馬,唔聲唔聲決賽可能幾impress到人果種。氣質仲係有啲青澀,但原來已經27歲仲係教師!不過佢五官幾Sharp,如果今屆有「最上鏡先生」獎又遇著一啲picky既女評審,佢有啲機會。

三甲機會率:50%

冠軍機會率:10%

最上鏡先生機會率:50%

_20160910_093817

2. 麥凱程

來自法國。一望張官方照已甚為捕捉到眼球,或者因為本人覺得「頸粗」既男士幾性感!本來係初期心水,但睇返佢自我介紹影片及近日活動照,覺得呢位麥先生好有果種「花花公子」格;加上各民調及網友心水均顯示麥凱程唔算好熱門,睇黎決賽要加把勁。

3強機會率:50%

冠軍機會率:25%

最上鏡先生機會率:40%

_20160910_095748

3. 梁裕恆

頂 頭大熱。3號既梁先生非常懂得表現自己,未入圍已經好識得表現自己「靚」既一面;又有「食蕉」同「露股」相(其實我冇睇過),應該非常「討好」一班GAY 選民。雖然樣貌身材條件不俗,但本人認為佢有點「過分自戀」(睇佢IG相同HashTag),加上係《當香港小姐遇上香港先生》以及不少既活動照都見到佢臉又肥、笑又露牙肉,「最上鏡先生」更不算十拿九穩,好幾個活動又竟然拎唔到獎,令人擔心佢既表現力不足而令佢倒灶。(其實我唔擔心,因為唔貼佢,哈)

3強機會率:75%

冠軍機會率:75%

最上鏡先生機會率:75%

_20160910_095805

4. 黎振燁

本屆另一熱門。4號黎先生係本屆非常有力爭冠既一位,雖然熱度不及3號,但係從官方自我介紹影片可見黎先生既包裝非常之有「香港形象」,因而本人非常睇好佢 奪冠;而且身高膚色氣質樣貌都非常似古天樂,咁都不得止就連背景同聲線都似到嘩嘩聲,加上身高體形不俗,若果決賽表現理想可能擊敗3號登上寶座。不過4號 最大既致命傷係其唔穩定既樣貌,臉既輪廓唔算好靚,有礙爭最上鏡(若比女評審選)。

3強機會率:80%

冠軍機會率:65%

最上鏡先生機會率:35%

_20160910_095818

5. 胡㻗

本 屆14位入圍者中其中3位同TVB藝員有親屬關係之一位。5號胡先生挾2008香港先生少年組冠軍羅天宇既「同母異父」細佬之名,本來唔入13強但又無啦啦入到,令人抓頭。表現未算突出,說話談吐合格但觀眾緣似乎冇佢哥哥咁好,或者因為佢住過泰國搞到佢廣東話又唔正又有口音,氣質又邪邪地所致。而佢既學歷更係 全部對手當中最低(中學畢業),唔知觀眾會唔會因此對佢有所挑剔呢?雖則如此,但仍獲唔少偽員力撐佢。(其實都係出員偽員朋友細佬關係掛?)

三甲機會率:40%

冠軍機會率:5%

最上鏡先生機會率:30%

_20160910_095832

6. 馬俊傑

本屆陪跑佳麗之一,雖然氣質太小白臉,但竟然已經有成26歲(查實歷屆港姐都有一大堆呢類佳麗)!係10位參選者當中毫不起眼(就連個入圍名單都係睇成唔知N次先知有呢位馬先生),樣貌身材平庸不特止,連個名都一樣,惟一可取之處就係比較親切感。

三甲機會率:15%

冠軍機會率:0%

最上鏡先生機會率:0%

_20160910_095849

7. 楊灌澤(多倫多)

同5號一樣,7號楊先生係挾程可為侄仔之TVB親屬之名入圍。話雖如此,TVB既選美從來無視背景親屬關係;加上以楊先生既質地,陪跑指數高唱入雲。(來自阿FUN既經典一句)

三甲機會率:10%

冠軍機會率:0%

最上鏡先生機會率:0%

_20160910_095906

8. 伍禮騫

面試試被似「葉繼歡」因而極不討好,初時見佢笑起上黎對眼同個笑容都有啲邪牌樣;但身形不俗,而本人覺得佢都夠陽光,加上做過模特兒,經驗理應比其他大熱冷門豐富。若決賽夜狀態回升,有力爭三甲及最上鏡。

三甲機會率:65%

冠軍機會率:35%

最上鏡先生機會率:55%

_20160910_095921

9. 丁子朗(多倫多)

個人感覺佢太「鄰家男孩」,外形未算最突出,但又已經得到「現場最受觀迎香港先生」獎(其實唔知有咩人投),加上似乎係最有觀眾緣既一位,可被視為黑馬。

三甲機會率:45%

冠軍機會率:10%

最上鏡先生機會率:5%

_20160910_095934

10. 梁賢基(溫哥華)

對住鏡頭不甚自然,髮型亂七八糟,廣東話又未掂又有口音,談吐出事,連個名都好唔得。同6、7號一樣,都係屬「小白臉」那一類佳麗。(若果14個裏面有3個呢類還可以接受,但10個有3個都真係令成個比賽冇咁好睇)

三甲機會率:15%

冠軍機會率:0%

最上鏡先生機會率:0%

 

最後總結:

個人心水

冠軍:4. 黎振燁
亞軍:8. 伍禮騫/2. 麥凱程
季軍:8. 伍禮騫/1. 鍾君揚

最上鏡先生(唔知有冇,估左先)

全男班評審5強順序:4/8/2/3/1
全女班評審5強順序:3/2/1/8/4