《2018國際中華小姐競選》觀後感

8fa9f51b549d62964caea5c5a12c08ff

今次呢場華姐競選本身冇任何預期同希望,賽前更無花時間睇吓今屆有咩佳麗!不過睇完呢晚比賽之後,有少少睇法想寫低:

  1. 呢個三甲組合所代表城市,完全跟1999年嘅一模一樣
  2. 佳麗整體質素可能堪稱係1994年之後最差嘅一屆,睇完頭3部分真係冇乜邊幾個選得落,班佳麗又係選完之後連樣帶名被遺忘。
  3. 多咗幾位佳麗嚟自冷門城市:夏威夷、老撾、大溪地。當中老撾係首次派佳麗選華姐。之不過點解又會冇咗奧克蘭、曼谷(仲有之前嘅芝加哥、西雅圖)?係咪TVB慳皮、焗住要限制到得16個參選?
  4. 成個製作變得好流水脹,而且每一PART都係開頭慢慢嚟、之後好急好急就做完。
  5. 舞台近乎零設計:個殼一睇就認得係舊年港姐決賽用過、個背景就係舊年華姐用過,完全符合TVB循環再用嘅原則。而且又有一班二三線藝員坐哂係台兩邊,「攝鏡」不特止、佳麗仲要係班藝員背後行CATWALK,成個視覺效果好差。
  6. 司儀配搭:雖然呢3個都叫唔會好悶,但成晚覺得太過「rehearsed」過。
  7. 評判又係一班一二線女藝員/前華姐:舊年明明都請啲有名望嘅做,今年又係自己人做哂?不過成晚每位佳麗出過場後,個SHOT會有一秒甚至幾秒影住班(華麗)評判,莫非TVB都心知今年質素慘不忍睹,惟有搵班小生花旦撐場?
  8. 環節似返啲選美環節:不過睇到好悶(應該係佳麗質素問題)。民族服裝環節,睇到第10—16號佳麗表現先覺得終於有啲「正嘢」睇下;才藝表演相信係TVB心知最能帶動收視環節,所以今年比10強玩埋先淘汰到5強,不過才藝反而頭果幾個超好睇、臨尾幾個悶爆。
  9. 淘汰環節又係多餘:其實個比賽得10日咁短,TVB唔好嘥咁多時間搞淘汰,比多啲機會佳麗表現;今次10強才藝完咗先淘汰5強,但5強後又費UP感受就宣佈三甲、其實真係冇意義。寧願16位佳麗一齊爭三甲,個感覺一定緊張刺激好多。同埋咁多年都有一個問題:為乜唔選「最上鏡小姐」?華麗評判團果20幾個都比咗分啦,唔爭在選埋最上鏡小姐啦。

27459898_2190727984274303_5977469858730528979_n

睇完成晚比賽、心水三甲+5強:#2、#3、#10、#15、#16:

  • 2號楊筑晶(夏威夷):從來夏威夷嘅佳麗質素都係偏低、今次呢位又高身材又爆(38-27-38),而且民族服裝、才藝表演環節表現好突出,樣貌都算OK,估佢有機會冠軍/季軍,但咁都冇5強?唔知係咪因為一開場晚裝環節、一行出嚟就卡住枝咪成幾秒都未行出台,加上呢班女評判唔BUY佢呢種身材,所以大扣分?
  • 3號雷莊𠒇(香港):賽前已知佢CATWALK+身型都係超強、成晚表現絕對令人眼前一亮、廣東話亦見進步。最大敗筆反而係髮型。不過以TVB近年一貫作風、一定會內定佢呢種樣嘅佳麗冇冠軍、但又唔會冇三甲,所以估佢會有亞軍。最終得季軍但又被人狂彈,查實班觀眾有冇睇過其他極品佳麗啲樣同表現?
  • 10號李思佳(紐約):佢奪冠後我依然唔記得佢係叫咩名(雖然1號同佢撞名)。論樣貌算係今屆當算比較突出、柯德莉夏萍民族服裝有料到、泳裝問答表現平穩、中國舞才藝直抄舊年同樣係紐約嘅冠軍余思霆原地轉圈+一字馬,就咁樣令紐約突破性地BACK-TO-BACK拎多次冠軍。
  • 15號蔡苑庭(多倫多):識講廣東話係優勢,但泳裝先睇到佢得5″5,加上樣子唔算標青,表現太平穩。不過我鍾意佢問答,因為我一直都認同「情感」係人工智能不能取代嘅。
  • 16號伍殷嬅(溫哥華):又係識廣東話嘅加拿大佳麗,賽前已試戴過后冠、被視為熱門。可惜民族服裝開始暴露弱點、身高得5″4偏矮、CATWALK越行越冇自信、才藝真係比之前出過場嘅佳麗遜色,一整晚越比賽越跌WALK,落選係預料之內。(我覺得佢個樣過份成熟)

睇完成晚比賽,除咗覺得亞軍6號劉思延(洛杉磯)係爆冷之外,亦覺得成個比賽係已經「食之無味棄之可惜」。真係好懷念2012/2016呢2年嘅製作,下一屆就第30屆,相信依然會複製近幾年10日就選完嘅模式!

廣告

《2017國際中華小姐競選》賽前預測

今次《國際中華小姐》移師馬來西亞舉行,係自2000年後,第2次係香港以外,又係非中國城市舉辦。

TVB早係12月尾播定預告片,係威係勢咁話2017全球首場選美會「係雲頂舉行」;再加上TVB華姐官網、佳麗相都冇話循環用返過去幾年啲排版;更甚嘅係今年又改返大會評判選喎!決賽舞台會移師馬來西亞雲頂(2014吉隆坡黃之豫有提過下,但唔知到底係點?)個舞台點整都大過、華麗過TVB自己個豆腐潤一廠掛?(2013—2015呢3屆個舞台真係求其之作)如果TVB咁肯泵本,咁再寄望下製作方面,啲環節同賽制唔好再咁騎呢,所有佳麗起碼玩到5強、仲有唔好好趕時間、或者DUM時間啦。最最最重要……比冠軍繞場一周!

之不過早在去年5月已公佈此舉,本身都好期待,尤其因為成場比賽唔係100%由TVB插手。可惜又係貫切TVB搞華姐嘅作風,搞到成場比賽無聲無色咁。完全唔明白點解TVB要移師海外!更令我不屑TVB嘅係:連華姐HEA搞1星期、10日,居然可以咁肯搵個好嘅場地做個騷,仲要係外地;甚至正正經經咁搵大會評判選而唔係自己人選哂;反之同樣係10日求其宣傳下嘅香港小姐啦喎,真係……

講返今屆佳麗。其實只係10日選美,基本上都好難對佳麗有深入認識;加上全香港好似冇人知道星期日係搞華姐咁,就連我自己都冇特別去睇下佳麗資料同埋啲新聞!初步睇班佳麗記招啲相,第一個感覺係:今屆啲佳麗分咗2類,一係好「大媽」;另一類係好「妹」,大部分個感覺似啱啱讀完書冇耐果啲小妹妹咁!今年又多返2位佳麗咁「多」,但又見就係有2位佳麗幾驚嚇下!係電視咁岩見到16位佳麗,全體又變到一模一樣咁平凡!

不過再睇下,今屆真係冇乜邊個極度突出,冇乜邊個有「中華氣息」;加上又變返大會評判選,唔似舊年咁純睇現場表現同外形,見評判環節都應該對最後成績有影響下。所以今屆嚟講,都算係幾勢均力敵嘅一屆,好難估邊個可以在雲頂登上寶座

1-%e5%8a%89%e5%ae%a3%e9%80%b8

1. 劉宣逸(奧克蘭)

第一眼望佢,堅有韓星味道,但再望真啲變得好似貞子!年年奧克蘭都派啲出場後就被遺忘嘅佳麗(仲要因為改用城市名排號數,排1號都真係一出場就唔記得),希望今年呢位望落好有性格嘅佳麗,唔好似同樣係1號嘅2016港姐關可欣咁樣被唾棄,而係化返個靚妝出場爭返啲機會。

2-%e6%b1%aa%e9%9b%85%e5%a6%ae

2. 汪雅妮(曼谷)

曼谷年年出產靚女,但年年都飲恨,舊年果位差啲拎到季軍都衰埋(如果用2012、2014港姐賽制就肯定有個季軍先啦),反之1990年代得獎果啲就真係好唔掂!今年汪小姐都有曼谷佳麗一貫果種甜美,希望佢識講英文impress到啲評判。

3-%e9%a6%ae%e7%9b%88%e7%9b%883. 馮盈盈(香港)

未見班佳麗前,只認定馮盈盈入5強係一半一半機會。的確不論馮盈盈嘅外貌、戰鬥力、擺甫士、甚至係佢嘅機智風趣談吐,加上今屆質素,令佢係呢場選美幾佔優勢。不過我硬係覺得馮盈盈個PACKAGE有啲葉翠翠;加上本身材麻麻、身高亦唔高(雖然今屆身高差距冇去年咁恐怖);聽聞佢港姐才藝想表演魔術,呢個才藝真係擺落華姐的話似乎打唔到仗!同時今次唔係香港搞,或多或少都失咗啲主場之利,入5強或3甲都係炆炆地。
(另外,選港姐時發覺馮盈盈合埋嘴笑,個感覺幾嫵媚,果種嫵媚幾適合華姐)

4-%e6%9d%8e%e8%99%b9%e8%87%bb

4. 李虹臻(約翰內斯堡)

記招望佢又真係幾得人驚下,以為係芝加哥定大中華北方佳麗,點知係來自約翰內斯堡。南非真係耐唔耐先選一次華裔小姐,但最後都係選出呢種質素,除咗負責湊人數都唔知講咩好。

5-%e6%9e%97%e5%ae%a3%e5%a6%a4

5. 林宣妤(吉隆坡)

賽前呼聲好高,但近日個狀態似乎KEEP唔住。睇返佢當選後啲相,又真係幾索,仲少少似2006多倫多嘅倪晨曦。不過其實唔駛估,係人都會認為吉隆坡佳麗今年點都起碼5強,甚至3強機會甚大。但單薄身形,係主場或者多咗壓力,以及吉隆坡佳麗一向唔太突出嘅才藝,都係有礙爭取更高名次嘅因素。

6-%e6%9b%b2%e9%87%8c

6. 曲里(洛杉磯)

呢張相都已經叫做省鏡咗,記招果張(加上件衫)真係不敢恭維。抽中試戴后冠嘅佢,最後會唔會步幾位一樣試戴后冠嘅華姐咁入三甲,定係「咁好彩」試戴后冠嘅港姐咁慘敗?其實一個美國咁大,真係咁難搵到好似2004徐靜潔咁嘅佳麗?

7-%e6%9b%be%e7%90%b3

7. 曾琳(馬尼拉)

呢位佳麗越望越襟睇,身形又高佻,估唔到係來自久別4年嘅馬尼拉佳麗。佢個樣同1號一都,都係散發住韓國女星嘅味道,不過呢位望落似乎仲有深藏不露嘅Character-wise!近幾年華姐冠軍都係靠呢樣取勝,希望曾小姐由見評判到決賽當晚表現唔好令人失望啦。

8-%e6%88%8e%e8%9d%ba

8. 戎瑀(墨爾本)

完全唔肯定佢個名點讀。墨爾本佳麗衰就衰在經常被同國嘅悉尼佳麗搶鋒頭,今年呢位個FEEL有啲「港女」,但頗上鏡(似似地官恩娜),又係一隻黑馬。

9-%e6%9d%8e%e6%98%8e%e5%ad%90

9. 李明子(佛山)

個名同個人一樣咁平凡。話事話點解佛山唔係排4號而係9號?「南京」應該唔係9號添喎?好混亂。

10-%e5%bc%b5%e9%ab%98%e7%91%80

10. 張高瑀(蒙特利爾)

呢位佳麗氣質同其餘果堆好相近,暫時睇唔算好突出。

11-%e4%bd%99%e6%80%9d%e9%9c%86

11. 余思霆(紐約)

記招第一眼望落覺得氣質就似2015年8號李玉薇,但不論面型、身形、仲有條裙都好似同年季軍11號惠櫸喬,不過係額闊版!點知呢位佳麗真係同惠櫸喬一樣,來自紐約。吓!近3年紐約佳麗都正架喎,今年呢位……

12-%e9%bb%83%e5%98%89%e7%a9%8e

12. 黃嘉穎(三藩市)

三藩市舊年冇玩華姐,今年玩返。個樣都好「香港小姐」下,仲要係好重「藝員味」果啲,連個名都咁「香港」,我懷疑呢位佳麗根本係香港人;而且身高又麻麻,加上氣質麻麻,係今屆嚟講要「爆冷」入5強真係要有好強表現。

13-%e9%99%b3%e8%93%ac%e5%83%a1

13. 陳蓬僡(新加坡)

開頭望個人氣質好「大媽」下,連個名都係,但就叫做有果份東方女性嘅「高貴」,幾重黑馬FEEL。樣唔叫做特別甜美同省鏡,可觀嘅身高可能係入5強嘅其一關鍵。

14-%e4%ba%8e%e6%ac%a3%e5%8d%89

14. 于欣卉(悉尼)

呢一隻黑馬,要睇當晚表現有冇好似蔡美霆咁嘅Character-wise。

15-%e6%9d%8e%e7%8f%ae%e5%84%80

15. 李珮儀(多倫多)

望佢記招張相,想用「混血林凱恩」來形容佢。多倫多幫係2016香港先生、香港小姐競選成績彪炳,但華姐就越來越霉,今年多倫多又可能再食白果。

(話事話,到底新時代電視有冇後悔2013年因操行而冇比陳雅思多倫多華姐冠軍?陳雅思返嚟選港姐最終又係拎唔到冠軍;佢又有冇後悔當初多倫多選果時冇表現得乖啲,唔駛比人扣操行分扣到冇華姐冠軍?)

16-%e7%8e%8b%e6%80%9d%e6%80%9d

16. 王思思(溫哥華)

上年溫哥華有樣貌身形超班嘅朱亞琳參選,今年搵唔返同樣超班嘅當然係意料之內;今鋪華哥華佳麗反而係偏向近年少有嘅甜美形,雙眼仲好似懂得說話!溫哥華華姐嘅表現一向有保證;不過自2010年,華姐三甲排名Back-to-back都冇試過係同一城市拎到。咁睇下今年王小姐會唔會打破呢個宿命,為溫哥華再下一城(相信對溫哥華嚟講,華姐等同奧運咁滯,成績太差都難接受)。

最後總結個人心水5強:


2. 汪雅妮(曼谷)
5. 林宣妤(吉隆坡)
7. 曾 琳(馬尼拉)
16.王思思(溫哥華)


1. 劉宣逸(奧克蘭)
8. 戎 瑀(墨爾本)
13.陳蓬僡(新加坡)