《2017香港小姐競選》選美災難

唉……

《2017香港小姐競選決賽》,最終都係無颱風幫助下,錄得24.4點收視,但賽後就帶來種種風風雨雨。個人雖然無甚期望,但睇完成場比場後,實在有太多負面形容詞形容今屆港姐競選。「災難」或者是我對於成場比賽嘅感覺。

以為成場比賽無乜人留意,估唔到完咗之後會引來極大迴響。如果唔係搞成咁,真係唔知2017年大眾仲係咁留意港姐!今次無綫用九流方式製作成個節目,比人話得最多嘅當然包括:製作技術、比場環節、競選目的、賽制、評判人數、評判人選、三甲人選。尤其是今年賽制及評審方法,一選完就有唔少專業分析評論,以及反嚮,觀眾亦心中有數。

個人比較想講吓評判人選。起初以為今年取消全民投票,改用評判制,以為真係會請返啲社會賢達或名人做評審。點知,都係搵無綫自己啲藝員同歌星!鄭裕玲(2003)、宣萱(2004)都做過港姐評判,不過係真係同其他名流組成大會評判團去選!其他評判真係未夠班去做港姐評判。用咁嘅評判人選,令港姐降格到由40幾年前一個專業選美、到幾年前全民投票都可以話係民主選美、變到而家根本兒戲到……

評判團

至於成個決賽製作,真係令人咋舌。

  • 舞台:細、簡陋;中間果個巨型球,唔靚、「阻訂」。
  • 司儀:森美+麥美恩。森美做過2007、2011港姐司儀,算係咁啦,少咗一貫果種擘大個口大聲笑嘅風格;麥美恩,純粹嚟搞笑。呢個組合整體嚟講令港姐更加變成遊戲節目。
  • 服裝:外判比設計師設計嘅衫正常。最大敗筆係件冠軍袍,冇可能用米色吧?一來同件旗袍撞色,二來造唔出果種「閃耀冠軍光芒」嘅視覺效果。
  • 競選主題:「美麗大學」2004年用過,但啲佳麗學咗啲咩?(同埋今年係港姐45周年喎!)
  • 環節:肉酸。第一個比賽,開場晚裝,OKAY啦;第二個比賽,直播BATTLE,將班佳麗困係咁細間房表演才藝?而且「試食」都算才藝?然後同班Big Big明星吓舞就淘汰。第三個比賽,泳裝問答,已經算係最正常,每個佳麗都有好幾條問題但司儀隨機揀嚟問;之後行個圈又淘汰到到5強;5強講15秒感受就到最後3強。3強之後,冇比賽環節、冇任何嘉賓表演,咁就頒獎……

整體嚟講,今年雖然再冇「港男MIX港姐」,但比去年更肉酸!唔好話要港姐果種「莊嚴」,整晚決賽連少少比賽氣氛都冇,一味係度賣自家應用程式Big Big Channel,難為選選佳麗仲要參加果個「落選佳麗競選」……

舞台簡陋的舞台。個波好礙眼;要擺都應該擺側邊而唔係中間,何況個台又冇紅館咁大

醜衫一味賣BigBig Channel,惹人反感。
醜陋的跳舞裙……

冠軍袍不堪入目嘅冠軍袍……

至於各佳麗表現,真係好迥異:

7號黃凱琪

7. 黃凱琪

其實真係未曾記得佢咩樣。5’10″嘅身高令佢幾搶鏡,但都係無甚表現。

2號李清心

2. 李清心

由外形到表現,冇乜嘢可以令人想選佢入圍。

9號金美黎

9. 金美黎

輸得最不明不白嘅佳麗。失落本來屬於佢嘅「Big Big Channel 最受歡迎香港小姐」係一件事。但點解由頭到尾,個外形同之前所見差咁多?披頭散髮不單止,個妝化到佢本來個尖下巴冇咗、又包包面,成個人DUP哂,連佢自己都冇哂神彩!好有理由相信TVB係驚死佢民意高(心心數目)威脅其他心水佳麗,於是白白犧牲咗。其實論外形同問答,佢係無理由排名咁低。

3號梁雯蔚

3. 梁雯蔚

感覺到梁小姐係嘗試努力過。成晚好淡定,但過於平凡、過於四平八穩,答問題如是、擺POSE如是、成晚都係KEEP住同一個笑容。樣貌+身高實在令佢嘅發揮太有限,佢盡哂力架啦。

6號邱晴(2)

6. 邱晴

好多人戳佢5強不入,甚至連3甲不入唔抵,估唔到17歲嘅邱小姐係今屆嚟講都可以咁熱門,亦證明大眾係偏愛有觀眾緣嘅佳麗!身形係FIT咗、但整體感覺仍然未有港姐果種「成熟韻味」感覺,加上我由頭到尾都覺得佢冇靚過,比我都唔會揀佢入5強。

10號張寶欣

10. 張寶欣

  • Big Big Channel 最受歡迎香港小姐
  • 最佳首飾演繹獎

佢被討論得最多嘅固然係TVB造馬造個獎比佢,呢樣冇庸置疑。唔係點解會出現今年冇咗友誼小姐,但又會叫上屆友誼小姐,佢家姐頒個本來係9號金美黎拎嘅獎,最後比妹妹呢個場面!一路落嚟表現都係冇進步,最叫人搖頭嘅係點解以佢咁高學歷,表達能力咁弱?一出場披頭散髮、狀態一般,完全教人失望,難為仲有咁多人熱捧佢做冠軍!仲有人認為佢好似楊思琦,但楊思琦參選果晚狀態比張寶欣SHARP好多。話雖如此,佢果個「我絕對唔會做擦鞋仔」嘅答案幾有創意。

8號伍樂怡

8. 伍樂怡

  • 莎莎「我最喜愛佳麗」
  • 最佳莎莎KOL大奬

係決賽終於FEEL到佢果唓「仙氣」,仙氣到我覺得佢可以拎「最上鏡小姐」。整晚笑容有啲僵硬,整體表現不算特別差,入三甲係可以接受,但硬係FEEL到佢會大熱倒灶,結果同我賽前預測一樣。之不過又冇諗過佢輸咗,又真係有人將佢同將吳凱欣比較,甚至去到封伍樂怡為「民間港姐」。

4號黃瑋琦

4. 黃瑋琦

  • 香港小姐季軍

好多人都不滿呢位香港小姐季軍,黃瑋琦未去到「劣質港姐」嘅質素啩?完全覺得佢冇問題,狀態不俗,造型及外形不比任何一位佳麗差。廣東話係差咗少少,呢個會係當選香港小姐三甲嘅一大阻礙。近幾年季軍都迅速被遺忘,如非有咩大新聞,相信黃瑋琦入咗TVB都唔會有大作為。

1號何依婷

1. 何依婷

  • 香港小姐亞軍
  • 莎莎「美麗觸角大獎」

何依婷決賽嘅表現絕無令人失望。佢比賽時,真係好重何艷娟嘅影子,不論樣貌面形身形談吐,但就絕對冇何艷娟果唓「娘」味。雖然少咗份甜美,但依然幾上鏡,表現淡定、談吐流暢溫文,冇何艷娟咁CHUR;多咗騷首弄姿,但唔礙眼、整體外形高貴大方,今屆嚟講係「香港小姐冠軍」模範。當DO姐決定係5號同1號當中投票冠軍果時,我係屋企真係係咁嗌1號!

5號雷莊兒

5. 雷莊𠒇

  • 香港小姐冠軍
  • 最上鏡小姐

又一位備受爭議港姐冠軍。一出場紅色晚裝已經勁搶鏡,成晚不論擺POSE定CATWALK都超有環球小姐風範,歷屆港姐當中冇一位表現去到雷小姐嘅級數。身形比我見佢真人橫好多,但因此相比身形嬌小佳麗,就令佢係台上有更大發揮、更有台型。可惜論樣貌只及AMERICA’S NEXT TOP MODEL嘅級數。整體嚟講絕對係有個人獨特嘅風格。

至於唔識廣東話,翻睇1970年代嘅決賽,佳麗唔識廣東話冇問題:一來有外國人做評判、二來佳麗可以用英語作答(1977冠軍朱玲玲、友誼小姐施家怡就是例子);但到咗2010年代選港姐,冠軍唔識廣東話固然令觀眾覺得「唔夠香港」,另一方面亦要怪TVB將港姐降格,佳麗唔識廣東話就會係台上被玩!其實佢廣東話真係咁弱,應該請求司儀比佢用英語答返。

論當選後成為眾矢之的,仲要不斷發表言論。TVB固然責無旁貸,鬼叫用呢個賽制去選冠軍!另一方面就突顯咗雷小姐本身鬼妹仔「有果句講果句」嘅性格。綜合佢嘅形格同性格,或者雷莊𠒇應該選美洲地區選美/多倫多華裔小姐,而唔係每下愈況嘅香港小姐!

(整體嚟講,雷莊𠒇當選「選美冠軍」係可以,但當選「香港小姐冠軍」就爭啲。所以賽前也好,DO姐揀冠軍時也好,我都係揀1號先。而家當選冠軍,又冇得去參選國際性選美。)

三甲

三甲塵埃落定了。面對令大眾失望嘅賽果、慘不忍睹嘅競選模式、加上「不如改做TVB小姐啦」甚至「不如停辦啦好嗎?」種種劣評聲音,TVB還會捲土重來,延續食之無味棄之可惜嘅「香港小姐」歷史嗎?

<預測BLOGGER CHOICE>
冠軍:8. 伍樂怡
亞軍:1. 何依婷
季軍:5. 雷莊𠒇
最上鏡小姐  :8. 伍樂怡
國際親善小姐 :1. 何依婷
才藝小姐   :8. 伍樂怡
最佳泳衣演繹獎:5. 雷莊𠒇
最佳變臉大獎 :6. 邱 晴

圖片來源:《東網巨星》FACEBOOK《TVB》FACEBOOK

廣告

《2017香港小姐競選》賽前預測

「乜港姐唔係停辦咗啦咩?」我諗呢個會係普羅大眾係2017年對於香港小姐嘅印象。

一開始絕不期待今屆。首先今年係港姐45周年,「TVB50年 香港小姐 美麗是贏家」竟然係今屆口號,積係個重心喺TVB度。7月初揀咗人入圍,但竟然又縮到12個?果吓越來越冇興趣追蹤。7月13日班佳麗先正式見傳媒,TVB話會用返評判制度;而且唔搞香港先生,咁起碼唔會「港生撈港姐」;暫時又見唔到港姐毒藥余詠珊,突然又有啲希望。

之後冇聲冇氣。用果個BIG BIG CHANNEL,比啲佳麗去宣傳,但當時個APP係GOOGLE PLAY得10萬人下載,仲有咩宣傳效果呢?(我果時都冇DOWN)同時一班佳麗一入圍冇編號,估計一定會有淘汰。8月13播《不懂撒嬌的女人遇上香港小姐》,睇完之後又覺得其實都整得唔錯:論環節論比賽氣氛,正過2012嘅《選戰英倫》、又唔會好似2015《首回戰》《次回戰》過份著重才藝。但節目實在太到喉唔到肺,同埋何必分兩次各淘汰1位佳麗,而唔係一次過播完個節目先再淘汰2個?劉穎敏係個節目未出街已經被傳媒報導被淘汰咗、之後胡美貽又係無任何比賽下被淘汰,亂七八糟。

到選埋10強抽埋編號,咁啱TVB開始擺由第一屆1973年開始嘅香港小姐決賽上MyTV SUPER,又咁啱當時有「下載BIG BIG CHANNEL,送MyTV SUPER基本版一個月」呢個推廣,咁索性唔再追蹤今屆選美,反而疊埋心水係呢一個月內翻睇,兼完整咁錄低哂歷屆決賽,留返啲懸念等到9月3號睇決賽算數。(雖然由1973年錄起咁多屆港姐好CHUR好麻煩,但MyTV嘅版本比起我之前係百度雲搵到嘅決賽版本畫面更清晰,而且1970年代嘅決賽係網上幾乎搵唔到。所以幾麻煩去錄哂咁多屆,日後慢慢細嚼都值得。)

今屆港姐,惟有留返啲懸念去到9月3號先睇吓搞邊科。關於賽制,今年標榜會評判選,本身都預咗:一來年初搞嘅國際中華小姐都係請大會評判、二來舊年聲稱係全民投選嘅冠軍馮盈盈單嘢實在有太多風風雨雨,所以今屆改返用評判唔出奇。(其實會唔會同今年特首都係1200人選關係呢?)而去到呢一刻,未知請幾多評判、請咩人做評判,之不過我心裏最大嘅疑惑係:其實會唔會同2015、2016一樣,係假評判評審、真內定人選?

今年決賽做啲咩真係唔知,完全對決賽冇任何期望,但求個形式、氣氛唔好咁CHEAP,同埋唔好太多口水多過茶無謂環節。之不過有報導預計9月3日,決賽又打風。呢個颱風會唔會為今屆港姐帶來變數?睇吓TVB點執生。如果真係打得成風,希望今屆港姐收視因此而回升啦!

而論佳麗質素,過往每逢年份係「7字尾」都會有樣貌超班/驚豔級佳麗:

  • 1977:朱玲玲(冠軍、最上鏡小姐)
  • 1987:李美鳳(亞軍、最上鏡小姐)、邱淑貞(進入決賽後退出)
  • 1997:歐芷婷(5強不入)
  • 2007:何傲兒(8強不入)

今屆有冇驚豔級佳麗就見人見智。但好肯定嘅係今屆佳麗絕對係唔會令大眾留下深刻印象嘅一屆。

(1)何依婷
1. 何依婷

樣貌上鏡、談吐溫文大方、氣質高雅,各方面令何小姐置身今屆,係好有力奪冠嘅一位佳麗。但由評判選嘅話,鮮有呢類清純甜美嘅佳麗奪冠(一位比較近似嘅冠軍係2003曹敏莉),加上1號難啲攞冠軍。但估計何小姐應該KEEP到狀態。

三甲機會:80%
冠軍機會:55%
最上鏡小姐:70%

(2)李清心
2. 李清心

短頭髮令佢更平凡,《不懂撒嬌》更見佢上鏡嘅孖潤唇就更趕客。除咗個幾有風格嘅名,整體外形及各方條件唔突出,除非決賽夜表現出類似胡家惠嘅非凡口才,否則應該無緣三甲。

三甲機會:20%
冠軍機會:5%
最上鏡小姐:5%

(3)梁雯蔚
3. 梁雯蔚

同樣係短頭髮,但梁小姐比2號李小姐更平凡,加上佢5’1½嘅身高,令我諗起2016華姐,13號多倫多柯思懿。係《不懂撒嬌》無乜表現,泳裝環節更將梁小姐身材缺點表露無遺。以梁小姐質素,入TVB都係做獎品小姐居多,仲以為TVB唔揀佢入10強。沒有最矮,只有更矮,如果1976年5’2嘅梁靜文都可以拎到亞軍(儘管1976決賽佳麗整體勁矮),今年同樣係評判選,同樣係姓梁嘅3號梁雯蔚會唔會打破5’2呢個最矮三甲記錄?

三甲機會:10%
冠軍機會:5%
最上鏡小姐:5%

(4)黃瑋琦
4. 黃瑋琦

唔係傳媒眼中熱門,但黃小姐可以列入今屆都屬於靚嘅佳麗組別。係美國邁亞米返香港,廣東話流利,又冇令人生厭嘅口音,係今屆黑馬。

三甲機會:50%
冠軍機會:15%
最上鏡小姐:45%

(5)雷莊兒
5. 雷莊𠒇

5號雷莊𠒇,論外貌同埋個名好易令人留意呢位佳麗。一開始樣貌唔係咁討好(相信係官方照影得衰),去到《不懂撒嬌》表現唔太賣力下,贏咗3個回合,越戰越熱。外形唔算好有觀眾緣,倘若係全民投票,雷莊𠒇會係出局之選。但本人有幸係8月中遇上雷莊𠒇真人!化咗淡妝幾順眼、而且幾親切,身形高佻,同時又有異國風情,整體嚟講比評判選的話入三甲確實有理。呢類佳麗評判三甲當中,多數都會係拎亞軍。

三甲機會:85%
冠軍機會:35%
最上鏡小姐:30%

(6)邱晴
6. 邱晴

6號邱小姐最大賣點係參選年齡剛達下限17歲,對上一位17歲係2000年大熱陳凱怡(好似係)。邱小姐考完文憑試即刻參選,有報導報過佢參加過其他比賽,佢似係想入娛樂圈居多。而歷屆當中,17歲入三甲嘅佳麗只有3位,更無一位奪冠,以邱小姐實力及包裝,係幾難成為下一位17歲入三甲佳麗。係《不懂撒嬌》當中邱小姐都算醒目女,加上今年變返評判選,有啲機會入三甲,但頂多接受拎季軍,因為小妹妹FEEL實在太重。

三甲機會:20%
冠軍機會:0%
最上鏡小姐:10%

(7)黃凱琪
7. 黃凱琪

又係短頭髮佳麗,無乜嘢突出,極度令人遺忘。除非決賽表現極佳,否則都係陪跑。

三甲機會:20%
冠軍機會:5%
最上鏡小姐:15%

(8)伍樂怡
8. 伍樂怡

未入圍12強已成大大熱,被傳媒封做「仙氣李若彤」,個人覺得唔似李若彤。不論硬照定係動態,都唔覺得伍小姐非常標青,表現唔夠自信同落力,FEEL到佢會係今屆「大熱倒灶熱門」。若果伍小姐僅獲季軍/最上鏡小姐,甚至三甲不入,唔去到郭可盈/嘉碧儀/吳凱欣倒灶果種可惜。

三甲機會:50%
冠軍機會:35%
最上鏡小姐:50%

(9)金美黎
9. 金美黎

同5號一樣,又一位名字特別嘅佳麗。9號金小姐同樣係今屆屬於靚嘅佳麗,而且樣貌上鏡,氣質清秀,但唔太被留意,論風頭唔夠其他大熱。如非操行太差,整體實力絕對算係今屆有力入三甲嘅佳麗。

三甲機會:65%
冠軍機會:45%
最上鏡小姐:65%

(10)張寶欣
10. 張寶欣

舊年友誼小姐張寶兒個妹,同8號一樣未入圍又係大熱門。論外貌論包裝,張寶欣原先係各界一致睇好今屆三甲人選。誰不知係《不懂撒嬌》全程表現強差人意,參選目的似係嚟玩多過嚟爭后冠,越戰越冷,好多人都批死佢同家姐一樣三甲不入!個人亦覺得佢係「大熱倒灶大熱門」,如非決賽夜狀態回勇,三甲不入乃預料之內。雖則如此,張寶欣於今屆當中,仍有機會爭最上鏡小姐。

三甲機會:25%
冠軍機會:15%
最上鏡小姐:70%

 

最後總結

前5名(純競猜):
冠軍:1. 何依婷
亞軍:5. 雷莊𠒇
季軍:9. 金美黎
最後五強:4. 黃瑋琦/8. 伍樂怡

最上鏡小姐(恰當人選):
1. 何依婷
4. 黃瑋琦
8. 伍樂怡
9. 金美黎
10. 張寶欣
(今屆都有一半叫做上鏡,算係咁)

《2016香港小姐競選》及《2016香港先生選舉》終極賽果+總結

《2016香港小姐競選》係2016年9月11日圓滿舉行。睇完成晚決賽,終於明白點解一眾港姐迷對「香港小姐」再提不起興趣。星期六睇完香港先生,仲諗仲兩個比賽又可以分開,個台又搭得幾優雅,諗住呢晚港姐可以食返住個勢,點知!以為唔會出現既問題終究出現:一班港生上港姐決賽又再鬥過;成個比賽好大段時間係「搵演員」,推埋隻不倫不類既「MyTV Super」出黎就更甚!(事後睇返維基百科以及兩比賽合併新聞先知原來係配合MyTV Super啟用)由一開始FOLLOW住個比賽,到見到余詠珊同TVB高層可以公器私用到咁,真係好心酸……

事前都預左係冇乜NOISE既兩個比賽,呢晚靜英英咁選完個冠軍出黎,冇乜聲氣都係意料中事,FACEBOOK更唔似舊年咁瘋狂式洗版。點知去到星期一,就開始有返啲NOISE啦;亦喜見有一啲討論諸如「亞軍正過冠軍」、「C君塊面對住劉穎鏇個胸」,「港生港姐同場誕生」亦有人抽水、都有人話「TVB重女輕男」。當然,大眾都開始唾棄成個比賽模式,連前港姐都話比賽似係「選演員」。但今鋪聯合,既幫港生追勢,港姐又唔駛死,投票人數又同舊年一樣有23萬,睇怕下年都仲有得搞啦,真係恭喜賀喜余詠珊啊!

司儀方面,有成5個,實屬多餘,農夫換返港姐元老級金牌司儀曾志偉仲好,不過點解請唔郁志偉既原因就唔駛多講啦。之不過呢個司儀組合都叫有啲火花,又冇起勢DUM時間。搵阿Bob都好,反應快講野流利,應帶起氣氛時帶起、應正經時正經;農夫同DO姐都叫生鬼;至於Miss HK Pigeaon 陳百祥今晚都冇乜廢話連篇,見到有啲準備。以為今年成個比賽都冇乜聲氣,一班佳麗又冇乜見報,諗住啲司儀同班佳麗猶如陌生人;又唔係喎,好流利咁讀到佳麗名,仲要講到邊個大熱,有啲意外。

正於舞台,係成晚最大既敗筆。港生個台明明搭得好優雅,攞鏡頭攞得幾靚之餘又唔見有咩人攝鏡,個背景熒幕好大程度似係為一班香港先生而設添。點知今晚真係……四個字:循環再用!其實連續兩晚比賽,都預左會係用返港生個台。首先熒幕畫面,開場由「晚空」綻放成「鑽石」成晚老是常出現,雖然唔叫差但最弊似用PowerPoint整出黎既效果!另外,都有唔少野都係循環再用返余詠珊用過既野:

  1. 「Miss Hong Kong Pageant 2016」個牌擺明係循環再用2013果個
  2. 兩邊條樓梯係2014
  3. 夏日泳裝,果個背景啲波板糖,又係2013既意念
  4. 森林泳裝,擺明係2015啦;再睇真啲,連背後佳麗張相同啲佳麗資料擺法,同2015真係一模一樣

20162016

2015-%e6%b3%b3%e8%a3%9d2015

2014-%e6%a8%93%e6%a2%af2014

2013-%e6%b3%a2%e6%9d%bf%e7%b3%962013

至於全晚最肉酸既位,當然係果嚿「MyTV Super」機械人!個台已經細,整舊咁既野更顯個舞台係好袖珍;要擺唔緊要,但成舊野睇唔出有幾增強視覺效果,「MyTV Super」呢幾個字更突顯今晚比賽係為TVB選藝員而設,焦點再唔喺班佳麗度!又好搞唔搞,台外兩邊又分上下層咁當觀眾席擺人上去坐,又有人攝鏡之餘,令到成晚氣氛唔似「比賽」,似係「節目巡禮」啊陰公!不幸中既大幸係:舊野推得返入去!

成晚啲音樂亦係「循環再用」。出場麥明詩表演果段,又係抄2013開幕;佳麗出場果首就係抄2012,但好野唔怕再用,個畫面都OK。有幾部分去完廣告返黎,就有現場用提琴拉奏出港姐音樂,有啲新鮮感。不過去到頒獎果下就有問題:為乜宣佈友誼小姐、最上鏡小姐、港生港姐季軍、亞軍果6段音樂又係播完又播呢?聽到好悶,冇乜高潮起伏。去到麥明詩讀卸任感言,果段音樂竟然係用返2012開幕果段,而唔係1993年決賽播足成晚、1994年決賽莫可欣卸任,以至1996年開始連續20屆卸任都會播果段,怪!

評判及賽制方面,「最上鏡小姐」評審係來自TVB劇集界及歌唱界2男2女:胡定欣、許志安、梁詠琪、陳展鵬。個人感覺冇乜問題,但聽到2014做過既胡定欣今鋪話「上鏡靚過真人」有啲驚!(當年佢係揀黃碧蓮既)至於選三甲,基本上沿用今年港生及舊年港姐「最強一分鐘」賽制,星級評審剩低24位。可惜今年透明度奇低,冇講到被投選冠亞季既佳麗獲得既分數,又剩係宣佈兩個冠軍既「冠軍票數」,查實有成23萬人投,但馮盈盈得36,679又真係低得可憐;但正因為賽果合理,所以先冇人查證……

全晚環節都係睇到人冇心機。港生啲環節都叫Organised,焦點都叫做係班先生度;但港姐完完全全係似為TVB選藝員。(根據20強佳麗何瑩瑩非正式書面答覆,本來應出現既才藝表演取消左。)

  1. 開場:10位港生伴港姐,又用返2012開場果首音樂,都叫做好聽。不過由Leslie Lee設計的《星與美的邂逅》晚裝……幾肉酸。10位佳麗自我介紹+進行問答,呢啲先係正路問題,唔該!點知4位港生,今晚又出黎比賽?(心諗:若真係兩選美合併,應該係咁搞!)順帶一提:雖然要輸左果6位港生出場係好瘧待,但全線狀態好過前一晚決賽。
  2. 多才多藝:本以為第2、3環節一定係才藝表演,點知原來係余詠珊選美一定有既跳舞。佳麗啲頭髮冇紮起,個個都揸住枝管跳,冇人雞手鴨腳,幾有動感。好快跳完唔知搞咩,原來係比班「星級評判」一輪咀講有咩節目做,要揀咩人。成半PART都係評判講哂,選藝員選到出哂面,救命!不幸中既大幸:有一份合約係面膜廣告商合約。接住10位佳麗就SELL自己。
  3. 泳裝問答(一)夏日:佳麗頭髮冇被紮起,更大突破係啲CATWALK冇以前咁死板,有好幾位行得甚有超模FEEL。之後啲問答又出事:就係啲「女士問題」,雖叫考反應談吐但都似考埋演戲,問題未去到2005果種露骨但都係低俗無倫!除此,又有港生4強出黎問問題;嘩,如果真係合併左兩選美,分分鐘成PART都係男女PK賽都似!然後有6位落選港生揀選港姐港生。
  4. 泳裝問答(二)森林:10位佳麗再度登場,真心覺得今晚CATWALK係好好睇。輪到6—10號佳麗問答,同樣都係果啲低俗問題,只見後面熒幕真係抄足2015。
  5. 晚裝:由4位香港小姐招募大使領10位佳麗,穿著由時裝設計師Kev Yiu與胡杏兒設計的《流光溢彩》晚裝,相當華麗。胡杏兒分享心聲同最鍾意既佳麗,佢就揀2號劉穎鏇。之後又係去返簽邊啲人做咩節目,又佔哂成PART一半時間,又比森美CHUR住,DOWNGRADE哂。
  6. 嘉賓表演、頒獎、宣佈4強:先由李克勤獻唱《一個都不能少》,10位佳麗陪伴擺下POSE顯美態,都唔錯,但感覺好似…華姐!宣佈最上鏡小姐,我個心係勁跳,可能因為呢個獎競爭大,估計應該係5>7>2攞,最後係2號劉穎鏇獨得,個心定啲;然後去到4強,估計以今晚表現同評判眼光,應該有2、6、7,估計5/10都有可能。宣佈第2個係7號,開心到拍手;宣佈第4個,台下勁叫3號,最後係5號彈出,好欣喜。
  7. 「四強對四強」演講:本身係一間大學開住MyTV睇,但坐住間房就快閂,最後要臨急轉場,忙中仲要改TVB Fun香港小姐投票選擇。一開始睇已經係1號香港先生演講,原來又係4位港生再比賽!之後再聽,每位佳麗既演講都幾令人為之動容。
  8. 宣佈香港先生及香港小姐三甲、冠軍繞場一周:歷史上首次同台宣佈香港先生同香港小姐三甲,次序先香港先生後香港小姐,交錯宣佈季、亞、冠軍。最衰係啲音樂,播完又播,HEA到!港生季、亞、冠頒獎者係岑麗香、陳凱琳、袁偉豪,意料之內。而港姐呢個4強組合,估計季、亞、冠次序係:7、2、6,結果中左。最後冠軍繞場一周,個畫面又真係唔肉酸,但叫奇怪!

總結黎講,成晚RUNDOWN係選藝員!而港生決賽都冇港姐一同比賽,反而港姐決賽加入返港生4強,予人「港姐撈港生搞、港生獨自一場決賽」之感。不幸中大幸就係即使OVERUN哂,都冇一味HurHur聲趕頭趕命!(因為係《傳奇誕生》扣返起啲時間)

最後14位佳麗表現,港生4子全線好左,反而港姐幾乎全線跌哂WATT,得5號蘇韻姿叫做狀態大勇。

5-%e8%83%a1%e3%bb%97

5. 胡㻗

  • 香港先生第四名

等左成日都係得個桔,今晚個樣好左,但全晚最唔掂係果句「不應批評台上每位參賽者」。

1-%e9%8d%be%e5%90%9b%e6%8f%9a

1. 鍾君揚(多倫多)

  • 香港先生季軍
  • 現場表現最佳香港先生

黎振燁丁子朗鷸蚌相爭,鍾君揚失利,樣貌YOUNG得黎幾吸引。雖然係多倫多係贏左今次亞軍丁子朗,而成晚冇乜表現機會下僅獲季軍,但睇佢似乎好滿意。

9-%e4%b8%81%e5%ad%90%e6%9c%97

9. 丁子朗(多倫多)

  • 香港先生亞軍
  • 最上鏡先生
  • 現場最受歡迎香港先生

丁子朗絕對係香港先生既一個經典人物:20歲都唔夠就打入香港先生三甲,仲成為首個「最上鏡先生」兼三料香港先生亞軍。我覺得佢今晚個樣先叫做「上鏡」喎。唔知丁子朗呢位咁年輕既最上鏡先生,又會令幾多男仔/男人會話「夢想係成為香港先生」呢?

4-%e9%bb%8e%e6%8c%af%e7%87%81

4. 黎振燁

  • 香港先生冠軍

黎先生今鋪以44,420「冠軍票數」及30歲之齡成為香港先生冠軍,其「好男人好丈夫」包裝被稱為「劃時代」既香港先生。今晚狀態FIT過昨晚,再冇駝背,問答環節KEEP住轉數快又冧死人。黎先生既表現同包裝好大機會成為新一代香港先生(甚至香港男人)既「典範」。

1-%e9%97%9c%e5%8f%af%e6%ac%a3

1. 關可欣

個樣勁邪,仲被批評為似妖后,又不在狀態咁,介乎笑與唔笑之間,最亮眼就係泳裝行出黎幾有超模FEEL。自我介紹詹SIR上身咁係港姐舞台咁大爆「AV」兩個字,本來係好好笑既GAG但竟然冇人笑。

4-%e4%bb%a3%e8%93%ae%e6%9b%a6%e4%b8%b9%e7%be%8e

4. 代蓮曦丹美

蒙古群主參選政綱為「將新元素帶入香港小姐」,結果今晚表現完美兌現她的競選口號:問答環節被司儀辣兩句就失控發花顛潑婦罵街,配合典型既低操行分又得罪髮型化妝既森林之王造型,十足十老虎乸上身使其強國大媽形象原形畢露,將香港小姐既高貴又大方形象推向新低點,與余詠珊誓要玩殘香港小姐招牌既意念配合得天衣無鏠。今趟余詠珊執到啦,連藝員訓練班都唔駛讀,拿拿聲簽天生注定食呢行飯既代蓮㬢丹美小姐捧做花旦啦!

8-%e9%98%ae%e5%98%89%e6%95%8f

8. 阮嘉敏

阮嘉敏由入圍時勁重藝員味,搖身一變成為淑女一名,唔知係咪因為咁令到佢一份合約都贏唔到。談吐流利,又夠轉數,短頭髮都幾耀眼。唔知點解著泳裝時,唔駛列隊,淨係佢一個行出黎都覺得佢好矮,或者條腰太短。

9-%e9%99%b3%e7%9d%a3%e9%9b%af

9. 陳睿雯

  • 最佳首飾演繹獎

流利的談吐是陳睿雯小姐既最大武器,果然今晚都淡淡定定,樣貌算係省鏡左,連鄉音都改善左,惟獨問答環節硬係UP唔出「食軟飯」呢3個字,到底係講唔出,定係唔識呢個粵話俗語呢?

10-%e5%96%ae%e6%96%87%e6%9f%94

10. 單文柔

小妹妹味不再,個嘴畫到好深令佢既魅力提升,問答都幾流利。佢啲衫好奇怪,總係搞到佢好骨架好厚但又唔橫,然後雙峰中間有條罅開到條腰到,但又唔覺得佢好豐滿,好出事。成晚睇佢甚有黃心穎影子,好驚佢爆冷拎埋亞軍,好彩。

3-%e5%bc%b5%e5%af%b6%e5%85%92

3. 張寶兒

  • 友誼小姐

表現不俗,保持甜既笑容,予人感覺親切。宣佈4強果時,去到第3個台下已叫緊佢,可見觀眾緣不俗。入唔到4強,係咪「香港小姐統籌委員會」發作?

5-%e8%98%87%e9%9f%bb%e5%a7%bf

5. 蘇韻姿(多倫多)

  • 香港小姐第四名

全晚狀態最FIT既一位,問答靈巧(雖然焗住發姣),樣貌好上鏡,拎唔到最上鏡小姐係咪因為全晚死KEEP住同一個笑容呢?個人亦認為蘇小姐入4強未算超額,但以佢既賽前熱度加上觀眾緣疲弱(仲有TVB Fun張相),好難唔墊底。

7-%e9%99%b3%e9%9b%85%e6%80%9d

7. 陳雅思(多倫多)

  • 香港小姐季軍
  • 最喜愛佳麗

陳雅思拎到季軍真係要去黃大仙廟還神!唔係話佢唔靚,而係因為以為觀眾緣薄弱加上並非傳媒焦點下,以為佢拎唔到票入圍,好彩表現上佳之餘仲有蘇韻姿入4強墊佢底。出場果時個樣非常老成,但仍然非常美豔;舉止聲線高貴優雅,面對司儀低俗問題仍答得大方得體,更顯其內涵,笑容亦非常甜美,一貫港姐冠軍標準模範,正宗符合「美貌與智慧並重」人辦。可挑剔既係雖選過美但臨場好鬼緊張。3年前選多倫多華姐飲恨只得亞軍,今次退步拎季軍,但見到佢都好滿意!鬼咩,張名雅當年冧SERVER,邵珮詩當年冇哂比佢更熱既入三甲;今鋪冇大會評判選,又撞正全民投票!
(但因乜解究志願會填「成為TVB藝人」架呢?)

2-%e5%8a%89%e7%a9%8e%e9%8f%87

2. 劉穎鏇(洛杉磯)

  • 香港小姐亞軍
  • 最上鏡小姐
  • 現場最受歡迎佳麗

劉穎鏇呢位亞軍同香港先生亞軍丁子朗不單拎同樣既獎,更一樣係19歲兼海外佳麗;此外,劉小姐更打破后冠魔咒!談吐流利,身材豐滿亦火速成話題,但個人認為佢壓台感未係發揮到最大。劉小姐亦係近年來少數咁年輕就入三甲既佳麗,以佢呢種質地絕對係近年香港小姐罕見上佳既國際性選美材料,當然TVB絕對將寶當係草。唔知劉小姐會返美國讀埋書先,定會入TVB呢?

6-%e9%a6%ae%e7%9b%88%e7%9b%88

6. 馮盈盈

  • 香港小姐冠軍
  • 現場最受歡迎佳麗

6號馮盈盈雖並非本人心水,但其包裝及表現仍算服眾。一出場個髮型唔得,頭頂扁塌塌,顯唔出佢既靚輪廓,幸好其青春甜美樣子搭救。問答口甜舌滑,而舉止亦略略滲透嫵媚既味道,演說自然流露,甚得大眾及星級評判歡心。其「本土」包裝亦屬近15年冠軍裏少數,最後獲得36,679「冠軍票」令全場大為感動,圓馮盈盈自小「拎住雞毛掃當權扙」之夢。

%e7%b9%9e%e5%a0%b4%e4%b8%80%e5%91%a8

「係咪好感人呢?」(Asked by 陳百祥)
歷史上首次香港先生及香港小姐同台繞場一周,睇落係幾感動,尤其聽到兩位既故事。

仲未夠喉?可以睇下今屆港姐港生既冷知識!寫到呢到,都好鬼長,買埋下星期一出版既TVB周刊(今年唔係號外啦),追蹤左好耐既比賽就完啦。唔知下年會搞成點呢?會唔會先港姐後港生?余詠珊又記唔記得下年港姐係45周年架?下年又派唔派馮盈盈去馬來西亞選華姐?好驚!

 

最後不如競猜埋即將公布既今年Blogger Choice賽果:

香港先生(好難估下)

冠軍:3. 梁裕恆
亞軍:2. 麥凱程
季軍:1. 鍾君揚
最上鏡先生   :9. 丁子朗
國際親善先生  :1. 鍾君揚
才藝先生    :9. 丁子朗
最佳泳衣演繹獎 :3. 梁裕恆
最佳變臉大獎  :8. 伍禮騫

香港小姐

冠軍:2. 劉穎鏇
亞軍:7. 陳雅思
季軍:6. 馮盈盈
第四名:5. 蘇韻姿
第五名:3. 張寶兒
最上鏡小姐   :2. 劉穎鏇
國際親善小姐  :7. 陳雅思/3. 張寶兒
最佳泳衣演繹獎 :2. 劉穎鏇
最佳變臉大獎  :10. 單文柔/9. 陳睿雯

《2016香港小姐競選》賽前點評及預測

今年港姐真係完全令一眾選美迷提不起興趣,更何況係大眾呢……

相對2015本人提不起興趣,去到決賽前2星期仲未記得幾號打邊個,其實本人對今屆港姐甚有期待,尤其係入圍30人,入圍2個星期已記熟邊個係排第幾,同埋佢地既姓名,連樣都記得,諗住TVB應該可以搞得好好睇睇掛!

點知,今年余詠珊一開始口響響講明增加名額至50人,到面試人數有140人。明顯今年質素有所提升架。本來好地地揀左30人,點知好搞唔搞,搞到好似2012咁,一開始就淘汰10人;點知係再衰過2012:係冇咩比賽表現下兩輪淘汰左20人,剩低10個先係8月中去日本福岡拍外景。其實港姐少左贊助加上搞埋港男預算少左又分薄左,又撞正奧運,因而減到10人入決賽,係可以理解;但明明今年30個人面,差既只係少數,質素不俗既就大有人在,偏偏TVB可以無聲無氣下 咁就淘汰汰左。咁對大眾黎講基本上都唔知道原來入圍仲有咁多個;而對一班候選佳麗黎講,唔好話爭獎項,就連增加少少知名度的機會都冇呀!余詠珊仲好意思將呢個比賽用黎選花旦……

如果比我搞,既然預算咁有限,我會6月選完30強,之後奧運前夕係電視城搞個1990年代決賽咁上下既嘉年華會,以鬥靚為主既準決賽,再慳錢啲可以彷效1999年比佳麗自選歷屆港姐著過既泳衣;然後選決賽12—15強再去拍外景,好過而家不倫不類真人騷又唔係又靜雞雞咁選左出黎都冇人 知,一班佳麗仲要比TVB咁樣糟蹋掛……

講返今屆佳麗質素,前文提過係有所提升,好多人都話冇咩邊個特別差。如果決賽增加入圍名額,比返啲落選既大熱入圍,整體質素都可以媲美1987、1988年(冇李嘉欣版)掛!另外,如果有留意港姐「魔咒」 既,應該知道自2008年起,逢係雙數年,入選佳麗質素都係好「平均」既,今年也不例外。而呢啲年份選出黎既港姐或港姐本身都會出事,同大家「回憶」下:

  • 2008:官網有另一版本賽果+HEA爆冠軍
  • 2010:冠、季軍因「美貌」而上CNN
  • 2012:港姐40周年,首次全民投票因「冧Server」爛尾收場
  • 2014:決賽賽制同當日「人大831特首普選框架」如出一轍,加上大熱吳凱欣落選,比人詬病為「假普選」

適逢今年又係雙數年,仲要撞正911決賽,唔知最終TVB又搞啲咩「傑作」猶如15年前恐怖襲擊呢?

_20160910_100009

1.  關可欣

本屆黑馬。今屆好多人個名又特別又撞名又剩,好多人都希望另一位姓「蘇」既「可欣」入圍之際,就殺出呢位姓「關」既。(可惜佢唔係姓「莫」,哈哈)身高不俗,包裝越見大方得體,本人覺得佢幾有機會突圍而出;不過樣貌不甚穩定,對鏡頭唔識表現自己最靚一面,但感覺最上鏡女評審應該幾LIKE佢。若果決賽夜憑 好表現入三甲或拎最上鏡,但加冕時個妝好肉酸,有機會成為比大眾插「樣衰」既箭耙(其實係TVB既問題)。

三甲機會率:60%

冠軍機會率:15%

最上鏡小姐機會率:30%

_20160910_100024

2.劉穎鏇(洛杉磯)

本屆次熱門。來自洛杉磯既劉小姐雖然年紀輕輕,但一身散發着一種獨特既異國風情,加上係30強當中最高,而身形豐滿,理應係標準既亞軍人辦。可惜觀眾緣未及大熱門,加上早期泳裝相見到條腰異常「肥美」,幸好近日狀態有所回升,入圍仍有機會。

三甲機會率:60%

冠軍機會率:10%

最上鏡小姐機會率:45%

_20160910_100036

3. 張寶兒

本屆大熱之一,有「少女周迅」之稱,笑容可算係30強最「甜」既一位。整體氣質談吐等各項都予人親切之感,本人仲認為佢有少少「王愛倫」既影子,不過身高身材麻麻,似乎一眾巴打未必好BUY。若要入圍,決賽夜要加把勁。

三甲機會率:50%

冠軍機會率:25%

最上鏡小姐機會率:50%

_20160910_100055

4. 代蓮曦丹美

本屆另一大熱門,不過熱得離奇。來自蒙古既4號全名為「木華兒.塔塔黎.代蓮曦丹美」,本身個名5個字已夠架勢,加上其「蒙古邵主」身分甫入圍已令人醒一 醒神。呢類佳麗絕對係「多多事實」、「造作搏搶鏡有新聞」的那一類佳麗:由未入圍已狂係IG哂三點式相、到宣佈10強前又有做義工執垃圾、東網投票更有疑似買 LIKE事件、對上一次泳裝出鏡更好學唔學學麥明詩「露毛」既屎橋,可見呢位4號絕不簡單,唔知後台工作人員有冇因此而扣佢操行分。而一頭藍色髮既4號氣質極為MK,時而啤酒妹時而砵蘭街;其蒙古郡主(積係強國)既背景都令一眾網民非常仇視佢添。話雖如此,呢類佳麗仍有一眾捧場客;若選中佢入三甲,今年應該有 唔少迴響。

三甲機會率:75%

冠軍機會率:55%

最上鏡小姐機會率:70%

_20160910_100120

5. 蘇韻姿(多倫多)

5號同1號一樣,同另一20強熱門佳麗「魏韵芝」撞名。入圍時未見突出,不過入圍後包裝漸見高貴,而且對住鏡頭非常淡定自然,說話談吐聲線令人舒服誠懇,流暢自然不造作,(可能因為做過電視節目主持)令人越來越受落,表現力甚強,絕對係係本屆黑馬。

三甲機會率:55%

冠軍機會率:20%

最上鏡小姐機會率:70%

_20160910_100134

6. 馮盈盈

本屆大熱,最大缺點係性格有形無形中涉透出一點點「港女」既味道,比著以前評判選,馮小姐呢款包裝頂籠得亞軍(女朋友格)。不過佢多次提及自己係「香港出世、香港讀書、係香港大學畢業」,用「本土」去Present自己,2013年7號沈桂澄和2014年11號吳凱欣已經用過;估唔到今鋪馮小姐翻炒呢個包裝又幾令人受落。另外,樣貌同個名有少少「李珊珊」既影子既6應該會係全男班評審下拎到最上鏡小姐,除非化醜妝醜髮型。

三甲機會率:80%

冠軍機會率:60%

最上鏡小姐機會率:75%

_20160910_100149

7. 陳雅思

本屆熱門,曾參選《2013多倫多華裔小姐》但竟然輸比梁淼,屈居亞軍,2014年冇得黎香港同陳凱琳拗手瓜。以陳小姐呢款包裝及氣質,由傳統大會評判選,唔好話呢10強,即使係30強當中仍屬冠軍鐵膽;加上2012年冠軍張名雅及2014年冠軍邵珮詩都係加拿大新時代電視既華裔小姐亞軍,再隔2年陳雅思理應延續呢個「魔咒」。另外,本人認為若最上鏡評審係全女班的話,陳小姐應該幾大機會攞到。可惜呢類「標準港姐」格既最大弱點就係觀眾緣麻麻,真替陳小姐擔心!不過咁,本人仍認為佢有入圍希望:皆因選美經驗豐富,若有超班表現可能係大會評判手中搶到勁多票入圍最後決賽;但若要全民投票奪冠,真係要搵好幾個差佢9條街既人墊佢底,即係跟住介紹既3位。

三甲機會率:85%

冠軍機會率:40%

最上鏡小姐機會率:75%

_20160910_100212

8. 阮嘉敏

8號阮嘉敏置身於30強當中惟一一個留着一把短髮,係TVB垃圾styling既選美當中初期十分搶眼。呢樣都唔係佢30強裏耀眼既一面,反而係佢個人滲透出一種濃烈既藝員味道,彷如2012年24號林泳淘既翻版;最攞命係連佢自我介紹都非常落力地SELL自己「想做電視節目」,其實阮小姐咁想入娛樂圈真係唔駛咁落力表現,反而學下4號咁多啲見報增加知名度仲好啦。雖然初期因同男明星拍過廣告,都叫受注目,但一路落黎冇乜進步,加上因為一句選民既意見而封鎖左選民IG,足見不單包裝唔夠大方得體,更係港女一名,決賽夜應該陪跑多。(話事話,原來佢同2014季軍7號何艷娟選過同一屆校花…)

三甲機會率:15%

冠軍機會率:0%

最上鏡小姐機會率:35%

_20160910_100225

9. 陳睿雯

來自強國9號陳睿雯小姐置身於30強當中完全毫不起眼,但竟然首輪無被淘汰,更在次輪由TVB FUN投票+大會統籌委員會評分下,擊敗眾多大熱次熱黑馬入圍,好有理有令人懷疑佢既「低調」、「乖乖女」性格甚討後台工作人員歡心,因而贏得不少操行分入圍。此外,現在中大就讀碩士既陳小姐談吐出奇流利又大方得體,估計應該有返咁上下內涵;比著以前由大會評判選,係見評判環節應該揮低其餘佳麗搶分入三甲。雖然陳小姐樣貌省鏡左,更係贊助商搞既活動當中拎到「最佳首飾演繹獎」已不算空手而回,但同4號一樣,其濃烈強國味+強國背景+鄉音廣話非常惹人仇視,加上表現平平無奇,決賽要入圍最後決賽真係要睇下啲後台工作人員操行分數幫唔幫到佢;同4號一樣選中佢,TVB會比人狂插。

三甲機會率:65%

冠軍機會率:0%

最上鏡小姐機會率:0%

_20160910_100246

10. 單文柔

單文柔本來係半冷門半黑馬入圍,其「小妹妹」感覺濃烈(但已經成26歲),說話談吐又「掘雷槌」,理應最多去到季軍。不過一去日本拍外景換上泳衣,其豐滿身材表露無遺;而在東網民調更加由頭帶到尾領先,拋離其他熱門兼穩步上揚,令人嘖嘖稱奇!表現亦見有進步,觀眾緣似乎不錯,睇下今年決賽夜能否保持優勢,定 係曇花一現。

三甲機會率:70%

冠軍機會率:70%

最上鏡小姐機會率:15%

 

最後總結:

個人心水

冠軍:7. 陳雅思
亞軍:2. 劉穎鏇/1. 關可欣
季軍:1. 關可欣/5. 蘇韻姿

最上鏡小姐

全男班評審5強順序:6/7/1/2/3
全女班評審5強順序:7/3/1/2/5